काठमाडौं,९ असोज । मधेसमा नयाँ राजनीतिक शक्ति निर्माणको अभियान सुरु भएको छ।
‘हुङ्कार मधेस’ नामक नयाँ राजनीतिक अभियानले अवधारणा पत्र र केन्द्रीय अभियन्ताहरूको सूची सार्वजनिक गर्दै औपचारिक रूपमा आफ्नो यात्रा अघि बढाएको हो।
अभियानले मधेसका राजनीतिक, आर्थिक, सामाजिक तथा सांस्कृतिक मुद्दालाई केन्द्रमा राख्दै युवा नेतृत्व र नयाँ राजनीतिक वैकल्पिक शक्तिको निर्माणमा जोड दिएको छ।
हुङ्कार मधेसले नेपाललाई सार्वभौमसत्ता सम्पन्न, स्वतन्त्र र बहुभाषिक राज्यका रूपमा स्वीकार गर्दै संघीय लोकतान्त्रिक गणतन्त्रात्मक शासन व्यवस्था, समानुपातिक समावेशिता र नागरिक सर्वोच्चताप्रति प्रतिबद्धता जनाएको छ।
अभियानले देशमा विद्यमान समस्या समाधानका लागि संघीयतावादी, पहिचानवादी, अधिकारवादी तथा प्रगतिशील शक्तिहरू एकजुट हुनुपर्ने धारणा अघि सारेको छ।
मधेसी, आदिवासी जनजाति, थारु, दलित, मुस्लिम, महिला तथा अन्य अल्पसङ्ख्यक समुदायको पहिचान, समानुपातिक समावेशीकरण र सामाजिक न्याय सुनिश्चित गर्न संघर्ष गर्ने अभियानको प्रतिबद्धता छ।
त्यस्तै, विगतका आन्दोलनबाट प्राप्त उपलब्धिको संरक्षण, संविधानमा सुनिश्चित अधिकारको कार्यान्वयन तथा आवश्यक संविधान संशोधन र परिमार्जनका लागि पहल गर्ने जनाएको छ।
हुङ्कार मधेसले आफूलाई केवल सामाजिक अभियानमा सीमित नराखी ८‘सभ्यतागत पुनर्जागरण, वैचारिक पुनर्निर्माण र सामाजिक रूपान्तरण’८को अभियानका रूपमा अघि सारेको छ। पूर्वीय दर्शन, सभ्यता, संस्कृति र ज्ञान प्रणालीलाई आधार बनाएर समाज, राज्य र अर्थतन्त्रको पुनर्संरचनाको बहस अघि बढाउने उसको भनाइ छ।
अभियानले सनातन, संघीयता, सामाजिक न्याय, सुशासन र समृद्धिलाई आफ्नो मूल मन्त्रका रूपमा प्रस्तुत गरेको छ।
