खाँदबारी । २१ कार्तिक | कोशी प्रदेश सरकारले युवाको उद्यमशीलता प्रवर्द्धन र रोजगारी सिर्जनालाई प्राथमिकता दिँदै उदय परियोजनामार्फत करिब आठ अर्ब रुपैयाँ बराबरको व्यवस्था गरेको मुख्यमन्त्री हिक्मतकुमार कार्कीले बताउनुभएको छ।
शनिबार सङ्खुवासभाको खाँदबारीमा प्रेस चौतारी नेपाल सङ्खुवासभाले आयोजना गरेको पत्रकार भेटघाट कार्यक्रममा बोल्दै मुख्यमन्त्री कार्कीले प्रदेशमै बसेर उद्यम गर्न चाहने युवालाई लक्षित गरी तीन वर्षसम्म सहुलियतपूर्ण ऋण उपलब्ध गराउने कार्यक्रम अघि बढाइएको जानकारी दिनुभयो।
साना तथा मझौला उद्यम सञ्चालन गर्न चाहने युवालाई लक्षित कार्यक्रमले उत्पादन वृद्धि, रोजगारी सिर्जना र प्रदेशको अर्थतन्त्र सुदृढ बनाउन सहयोग पुग्ने उहाँको भनाइ छ। युवालाई आफ्नै प्रदेशमा अवसर सिर्जना गर्ने वातावरण बनाउनु सरकारको प्राथमिकता रहेको उहाँले बताउनुभयो।
