काठमाडौं ,१ मंसिर। राष्ट्रिय स्वतन्त्र पार्टी (रास्वपा) सांसद पारसमणी गेलालले एउटा आश्चर्यजनक घोषणा गर्नु भएको छ । उहाँको घोषणा हो( प्रधानमन्त्री बालेन्द्र शाह र रास्वपा सभापति रवि लामिछानेसँग उहाँले खिचेको ‘उत्कृष्ट’ तस्बिर सामाजिक सञ्जालमा पोस्ट गर्नेलाई नगद पुरस्कार दिने ।गेलालको सचिवालयको फेसबुक पेजबाट एक सूचनामार्फत यो घोषणा गरिएको हो ।आगामी फागुन १२ गते विशेष फोटो तथा भिडियो प्रतियोगिता आयोजना हुन लागेको सूचनामा उल्लेख छ ।
सूचनामा भनिएको छ, ‘प्रतिनिधि सभा सदस्य निर्वाचन २०८२ का क्रममा सम्माननीय प्रधानमन्त्री बालेन्द्र शाहज्यू, आदरणीय पार्टी सभापति रवि लामिछानेज्यू तथा माननीय पारसमणि गेलाल र माननीय सूर्य लामाज्यू सँगसँगै रहेका उत्कृष्ट र अविस्मरणीय क्षणहरूलाई आफ्नो क्यामेरा वा मोबाइलमा कैद गर्नुभएको छ ? त्यसो हो भने अब आफ्नो प्रतिभा देखाउने र आकर्षक नगद पुरस्कार जित्ने अवसर नगुमाउनुहोस् ।’उत्कृष्ट फोटो तथा भिडियो पठाउने प्रतियोगीमध्येबाट ३ जना विजेतालाई आकर्षक नगद पुरस्कार प्रदान गर्ने भनिएको छ । तर पुरस्कार राशि खुलाइएको छैन । पुरस्कार राशिबारे छिट्टै भिडिओ सन्देशमार्फत सार्वजनिक गरिने जनाइएको छ ।
सूचनाअनुसार पुरस्कारका लागि यस्ता शर्तहरु छन् ।
– निर्वाचनका क्रममा खिचिएका उत्कृष्ट फोटो वा भिडियो पठाउने ।
– आफ्नो सामाजिक सञ्जालमा समेत पोस्ट गर्ने ।
– आफ्नो सिर्जनात्मकता र प्रतिभा प्रदर्शन गर्ने ।
सूचनामा लेखिएको छ, ‘अब खिच्ने मात्र होइन, आफ्नो प्रतिभाबाट नगद पुरस्कार जित्ने पनि हो । क्यामेरा र मोबाइलले खिचिएका उत्कृष्ट क्षण कैद गर्नु भएको छ भने विजेता बन्ने तयारी गर्नुहोस् ।’ गेलाल गत आम निर्वाचनमा उदयपुर १ बाट रास्वपा सांसद निर्वाचित हुनु भएको थियो । यस्तै तामाङ उदयपुर २ बाट निर्वाचित रास्वपा सांसद हुनुन्छ ।यो पुरस्कार घोषणालाई लिएर सांसदहरुको व्यापकरुपमा ट्रोल हुन थालेको छ । चर्चाका लागि हास्यास्पद स्टन्ट गर्न खोजेको भन्दै धेरैले आलोचना गरिरहेका छन् ।गेलाल उनै सांसद हुन् जो केही समयअघि ‘मेयरलाई सरुवा गर्नुपर्छ’ भन्ने फोन सम्वादबाट ट्रोल हुनु भएको थियो ।










