अमेरिका, २० असोज / सृजना भन्ने चीज पनि बडा गजबको हुन्छ । जसले दुःख सुख केही भन्दैन । अझ दुःखमा पो मौलाएर आउँछ । अनि जहाँ पुगे पनि यो मर्नुभन्दा पनि आफ्नोपनको सम्झनाले झन झाँगिन्छ ।
घरदेश छोडेर लामो समयदेखि परदेशमा बसेर श्रम खर्चिदै आउनु भएकी सानुमा ज्योतिलाई यस्तै भइरहेको छ । अर्थात परदेशमा रहँदा अझ सृजनाले भित्रभित्रै चिमोटेर गीत भएर बाहिर निस्किने ठाउँ खोज्यो ।
रामु गिरी र शारदा गिरीको कान्छी सन्तानको रुपमा कास्की जिल्लाको रमणीय तथा पर्यटकीयस्थल पोखराकी ज्योति विगत १२ वर्षदेखि युनाइटेल अरब इमिरेट्स अन्तर्गतको दुबईमा रोजगारी गर्दै सँगसँगै सृजनशील बन्दै आउनु भएको छ । गाउन औधी मन पर्ने उहाँले गीत गुनगुनाएर परदेशमा हुनुको टाढापन भुल्न टिकटकमा समेत गीत प्रस्तुत गर्दै आउनु भयो । त्यस क्रममा एउटा संयोग मिल्यो । टिकटकमा गीत गाउने क्रममा दुर्गाप्रसाद भट्टराईले उहाँको आवाजको प्रशंसा गर्दै एउटा गीत निर्माणमा लगानी गर्ने वाचा गर्नुभयो र सोही परिणाम स्वरुप म्यूजिक भिडियो सहितको गीत सार्वजनिक हुन पायो । जसको नाम ‘भावना’ जुराइएको छ ।
उहाँका श्रीमान सजीव आनन्दले पनि उतिकै साथ दिएपछि आफ्नो रहर पुरा हुन पाएको छ । यस बखत, टिकट्क लगायत अन्य मिडियाहरूमा नेपाली संगीत प्रेमीहरूले रिल बनाएर यसलाई भाइरल बनाइरहेपछि ज्योतिको गायनको आयतन संसारभर फैलिएर प्रिय बनेको छ ।
आधुनिक शैलीको प्रेमिल गीतमा के.एन. नेपालको शब्द र तुलाधर दर्नालको संगीत छ भने राहुल विश्वकर्माले यस गीतलाई एरेन्ज गर्नुभएको छ । गीतको भिडियोमा नायक जीवन कुमार ज्ञवाली र शिला गजुरेललाई रोमान्टिक रूपमा प्रस्तुत गरिएको छ । ज्ञवालीकै कोरियोग्राफी र निर्देशनमा तयार भएको यस भिडियोमा दुर्गा पौडेलको छायांकन र दीपक भिस्टाको सम्पादन रहेको छ ।
नेपाली गीत-संगीत, कला, भाषा, र नेपालीपनको संरक्षणमा समर्पित भएर क्रियाशील ज्योतिलाई क्रीयटिभ इडिटिङ गर्न पनि मन लाग्छ । उहाँले त्यसप्रकारको इडिटिङमा क्यापकट, टिकटकमा थुप्रै टेम्प्लेटहरु डिजाइन गर्नुभएको छ र त्यसलाई धेरै जनाले प्रयोग गर्दै त्यसखाले कलाको पनि प्रशंसा गरिरहेका छन् ।
दुर्गाप्रसाद भट्टराईको डीआरएस अनलिमिटेड च्यानलमार्फत सार्वजनिक सो गीतले ज्योतिलाई निकै उत्साहित बनाएको छ । परदेशमा रहेर पनि सृजनालाई अझ मौलाउने ठाउँ बनाएर भावनामा बगी बगी नयनभित्र डुब्दै कल्पनामा उडी उडी गगनलाई चुम्न सक्नु पक्कै पनि सृजनाको आकाश फराकिलो बन्नु हो, नेपालीपनको सुवास फैलिनु हो ।
