अमेरिका, कार्तिक ३०
जे.एन. दाहालद्वारा लिखित चर्चित नेपाली उपन्यास ‘प्रहेलिका’ अब अंग्रेजीमा ‘हर इनोसन्स डिस्कभर्ड’ नाममा प्रकाशित भएको छ ।
सो उपन्यासले साहित्य परिषद् भूटानद्वारा क्यानाडामा आयोजित सम्मेलनमा हिमटीका पुरस्कार आख्यान पुरस्कार जितेको थियो । त्रिभुवन विश्वविद्यालयका प्राध्यापक डा. बलराम अधिकारीले यस पुस्तकलाई कुशलतापूर्वक अंग्रेजीमा अनुवाद गर्नुभएको हो ।
उपन्यासले अनुष्का नामकी एक महिलाको कथा प्रस्तुत गर्छ, जसले आफ्नो विवाहको सुरुवाती समयमा पतिसँग भावनात्मक र शारीरिक सम्बन्धमा जोडिन संघर्ष गर्छिन् । आत्म-अन्वेषणको यस यात्रामा उहाँले आफ्नो अलैङ्गिकतालाई स्वीकार गर्दै त्यसले उनको पहिचानमा पार्ने प्रभावलाई बुझ्न थाल्छिन् । अनुष्काको कथासँगै मिसेस शर्माको संघर्षले लैंगिक विभेद र मानसिक जटिलताहरूको झलक दिन्छ, जसले पहिचान, सम्बन्ध र व्यक्तिगत विकासको जटिलतालाई अझै जीवन्त बनाउँछ ।
अनुवादक डा. अधिकारीले मौलिकपाठको सांस्कृतिक र भावनात्मक गहिराईलाई बचाएर अंग्रेजी भाषी पाठकहरूलाई नेपाली पृष्ठभूमिको विशिष्टता झल्काउने प्रयास गर्नुभएको छ ।
हर इनोसन्स डिस्कभर्ड अहिले अनलाइ मार्फत ईबुक, पेपरब्याक र हार्डकभर फर्म्याटहरूमा एमेजन, बुकटोपिया, बोकस र बार्न्स एन्डनोबलजस्ता प्रमुख प्लेटफर्महरूमा उपलब्ध छ । सो पुस्तकको प्रकाशकमा ड्र्यागन हर्स रहेको छ ।
जे.एन. दाहाल एक प्रतिष्ठित लेखकका रुपमा दरिदैे जानु भएको छ । जसले कथा, निबन्ध, र यात्रा संस्मरणहरू प्रकाशित गर्नुभएको छ । उहाँको कथा संग्रह ‘लेखककी छोरी’ले सन् २०२२ मा अनेसास उत्कृष्ट डायस्पोरा पुस्तक पुरस्कार प्राप्त गरेको थियो ।
