अमेरिका, मंसिर ८
अमेरिकामा रहेका नेपाली गीतकारहरूको साझा मञ्च ‘आप्रवासी नेपाली गीतकार संघ, अमेरिका’ले आफ्नो प्रथम वार्षिक साधारण सभा सन् २०२५ फेब्रुअरी २, (अर्थात २०८१ माघ २१ गते ) ओहायो राज्यको रेनल्डसबर्ग शहरमा गर्ने घोषणा गरेको छ । यस ऐतिहासिक भेलालाई सफल र स्मरणीय बनाउन संघले विभिन्न कार्यक्रमहरूको तयारी गरिरहेको छ ।
सरस्वती पूजाको दिनलाई अवसर बनाएर आयोजना गर्न लागिएको यस सभामा नेपाली गीत, साहित्य र सांगीतिक क्षेत्रका विभिन्न चर्चापरिचर्चा हुनेछन् । यस अवसरमा केही नयाँ कृतिहरूको लोकार्पण, सांस्कृतिक प्रस्तुतिहरू र साहित्यिक छलफलहरू समेत हुनेछन् । संघका अध्यक्ष हरि उप्रेतीले कार्यक्रममा सम्भव भएसम्म सबै सर्जकहरूको उपस्थिति सुनिश्चित गराउने अपेक्षा गरिएको बताउनुभयो ।
संघका संरक्षक, वरिष्ठ गीतकार ज्ञानेन्द्र गदालले सभा केवल साधारण बैठक मात्र नभई आगामी योजनाहरूको खाका प्रस्तुत गर्ने ऐतिहासिक अवसर हुने योजना सुनाउनु भयो । ‘उत्तर अमेरिकामा रहेका नेपाली सर्जकहरूको पहिचान र योगदानलाई अझ प्रोत्साहन दिन हामी यो कार्यक्रमलाई भव्य बनाउने प्रयासमा छौं ।’ उहाँले भन्नुभयो ।
यो मञ्च नेपाली साहित्य, विशेषतः गीत रचनाको संरक्षण, प्रवर्द्धन, र विश्वव्यापीकरणको उद्देश्यले स्थापना गरिएको हो । संघले प्रत्येक वर्ष सरस्वती पूजाकै दिन वार्षिक साधारण सभा गर्ने निणर्य गरेको छ। यसले नेपाली साहित्य र संस्कृतिको महत्वलाई अझै बलियो बनाउने विश्वास संघका पदाधिकारीले व्यक्त गरेका छन् ।
संघले सबै नेपाली साहित्यकार, गीतकार र संगीतकर्मीहरूलाई कार्यक्रममा सहभागी भई नेपाली सृजनाको एकताबद्ध शक्ति प्रदर्शन गर्न आह्वान गरेको छ ।
