एजेन्सी, फागुन ५
इजरायली प्रधानमन्त्री बेन्जामिन नेतान्याहुले गाजाबाट प्यालेस्टाइनीलाई हटाएर अन्यत्र सार्ने अमेरिकी राष्ट्रपति डोनाल्ड ट्रम्पको योजना उत्कृष्ट रहेको बताउँदै खुसी व्यक्त गर्नुभएको छ ।
जेरुसेलममा इजरायली प्रधानमन्त्री नेतान्याहु र अमेरिकी विदेशमन्त्री मार्क रुबियोको भेटमा नेतान्याहुले सो कुरा बताउनु भएको त्यहाँँका सञ्चारमाध्यमहरुले जनाएका छन् । सोे भेटपछि आयोजित संयुक्त पत्रकार सम्मेलनमा आसाद सरकारको पतन पछिको सिरिया, इरानले निर्माण गर्नसक्ने आणविक हतियार तथा हमासको शक्तिलाई कसरी कमजोर पार्ने भन्ने विषयमा छलफल भएको जनाइएको छ ।
सोही भेटमा गाजालाई अमेरिकी नियन्त्रणमा राख्ने ट्रम्पको दृष्टिकोणलाई कार्यान्वयनका बारे पनि सल्लाह भएको उल्लेख छ । अहिले मध्यपूर्वमा रहेको रुबियो साउदी अरेबियामा हुने रुस र अमेरिकाको शान्ति वार्तामा सहभागी हुनेछन् ।
नेतान्याहुले अन्तर्राष्ट्रिय अपराध अदालत (आइसीसी) माथि अमेरिकाले प्रतिबन्ध लगाएकोमा धन्यवाद समेत दिनु भएको छ । आइसीसीले गत वर्ष नेतान्याहुसहित तत्कालीन इजरायली रक्षामन्त्री युसुफ गालान्ट र सो समयका हमासका शीर्ष नेताविरुद्ध पक्राउ पुर्जी जारी गरेको थियो ।
