दमक, चैत ४
झापाको दमक नगरपालिकामा विभिन्न सीपमूलक कार्यक्रम सञ्चालनका क्रममा वडा नम्बर ६ ले कफि बनाउने ‘बारिस्ता’ तालिम लिनेकालागि उद्यमशीलतामा सघाउने भएको छ ।
१ महिने बारिस्ता तालिमको सोमबार समापनका अवसरमा बोल्दै दमक ६ का अध्यक्ष टेकबहादुर थापाले युवाहरुलाई स्वरोजगार बन्नकालागि बारिस्ता तालिम प्रदान गरिएको जनाउनु भयो । तालिमलाई भरपुर सदुपयोग गर्न अनुरोध गर्दै उहाँले वडाले उद्यमशीलताकालागि केहीलाई सहयोग पुर्याउने समेत बताउनु भयो ।
कार्यक्रममा दमक नगर उपप्रमुख रेगिना भट्टराई प्रसाईंले प्राविधिक ज्ञान लिनु आजको आवश्यकता भएको कुरालाई महसुस गर्दै त्यसमध्येको एक बारिस्ता पनि रहेको जनाउनु भयो । उहाँले बारिस्ता सिक्नेहरुकालागि रोजगारीको अवसर रहेकाले त्यसमा मेहनतकासाथ काम गर्न अनुरोध गर्नुभयो ।
तालिम लिनेहरुले समेत बारिस्ताको धेरै कुरा सिक्न पाएको र आफूले केही गर्ने इच्छा जगाएको मनन् गरेका छन् । त्यसमध्येकी बन्दना रिमाल दंगालले अझै केही कुरा सिकेर व्यवसायिक हिसावले अघि बढ्न सकिने जनाउनु भयो ।
तालिम समापनका अवसरमा कार्यपालिका सदस्य विणाकुमारी साह, कमला बस्नेत खाती, वडा सदस्य कमलकुमार श्रेष्ठ र डेन्जोङ शेर्पाको उपस्थिती रहेको थियो ।
सो अवसरमा, तालिममा सहजीकरण गर्ने संस्था ग्यारेज बारिस्ता स्कुल दमकका छत्रविक्रम कुलुङलाई प्रशंसापत्र र सहभागि प्रशिक्षार्थीलाई प्रमाणपत्र प्रदान गरिएको छ ।
वडा कार्यालयको १ लाख ५० हजार रुपैयाँको बजेटमा माघ २० देखि तालिम सञ्चालन गरिएको वडा सचिव प्रकाश घिमिरेले जनाउनु भयो । तालिममा १६ जनाको सहभागिता रहेको थियो ।
