काठमाडौं,२३ साउन ।अवैध रूपमा भारत हुँदै घरेलु कामदारको रुपमा तेस्रो मुलुक जान लागेका ४० नेपाली महिलालाई प्रहरीले भारतको राजधानी नयाँ दिल्लीबाट उद्धार गरेको बताएको छ।
घरेलु कामदारका रूपमा कुवेत, साउदी अरब, ओमान, दुबई लगायतका खाडी मुलुकमा जान लागेका उनीहरूलाई दिल्लीबाट उद्धार गरेर काठमाडौँ फर्काइएको हो।
उनीहररु गैरकानूनी रूपमा दिल्ली पुगेको थाहा पाएपछि नेपाली राजदूतावासको समन्वय र भारतीय प्रहरीको सहयोगमा ‘किन इण्डिया’ले बुधबार राति उद्धार गरेको थियो।
दूतावासले समन्वय गरेर महिपालपुरका विभिन्न होटलहरूबाट ६३ जना नेपाली महिलालाई निकालेको थियो। त्यसमध्ये २३ जना आवश्यक कागजात पूरा गरेर युरोपका विभिन्न देश जाने तयारीमा रहेको पाइएको दूतावासले जनाएको छ। उनीहरूलाई भने छाडिएको दूतावासका अधिकारीहरूले जनाएका छन्।
नेपाल फर्काइएका ४० मध्ये ३१ जना कुवेत, ४ जना ओमन, ४ जना दुबई र १ जना साउदी जाने तयारीमा थिए। उनीहरूलाई नेपालका २४ जिल्लाका विभिन्न स्थानबाट दलालहरूले दिल्ली पु¥याइएको खुलेको छ।
यसअघि साउन ८ गते पनि ४७ जना नेपाली महिला दिल्लीबाट नेपाल फर्काइएका थिए। उनीहरू भिजिट भिसामा कुवेत जाने तयारीमा थिए। उनीहरू दलाललाई मोटो रकम बुझाएर भिजिट भिसामा कुवेत जान लागेका अनुसन्धानको क्रममा खुलेको प्रहरीले बताएको छ।
