दमक | २३ साउन | झापाको माईखोलामा दाउरा निकाल्ने क्रममा खोलाले बगाउँदा एक जना पुरुष बेपत्ता भएका छन्।
जिल्ला प्रहरी कार्यालयका अनुसार आज विहान ११:३० बजे शिवसताक्षि नगरपालिका–१० र ७ को सीमाना, टेक्रास्थित माईखोलामा कन्काई नगरपालिका–५ का ६० वर्षीय चन्द्र बहादुर बिकलाई खोलाले बगाएको हो ।
घटना बारे जानकारी प्राप्त हुनासाथ अस्थायी प्रहरी चौकी माईधारबाट प्रहरी टोली खटिएको छ। नेपाल प्रहरी र स्थानीयको सक्रिय सहभागितामा हाल खोजी तथा उद्धार कार्य जारी रहेको जिल्ला प्रहरी कार्यालयले जनाएको छ।
वर्षायाममा पानीको बहाव तीव्र हुने भएकाले नदी तथा खोलातटमा गतिविधि गर्दा उच्च सतर्कता अपनाउन प्रहरीले सबैलाई आग्रह गरेको छ।
