दमक,२८ साउन । सुनसरीको दुहबीमा निर्माणाधीन घरको ‘सेफ्टी ट्यांकी’भित्र ठेकेदार र कामदारको शव फेला परेको छ । घटनाबारे प्रहरीले अनुसन्धान गरिरहेको बताएको छ ।
दुहबी नगरपालिका–४ शिव मन्दिर चोकमा चन्द्रिका रौनियारको नयाँ बन्दै गरेको घरको ‘सेफ्टी ट्यांकी’भित्र बुधबार बिहान १० बजेतिर शव फेला परेको सुनसरी प्रहरीका प्रवक्ता डीएसपी योगराज खतिवडाले बताउनु भयो । उहाँका अनुसार दुहवी–२ का अन्दाजी ५० वर्षीय श्यामबहादुर तामाङ र ३२ वर्षीय रमेश राईको शव ‘सेफ्टी ट्यांकी’भित्र फेला परेको हो ।
प्रहरीका अनुसार मृत फेला परेका तामाङ उक्त घर बनाउने पेटी ठेकेदार र राई कामदार हुन् । ‘सेफ्टी ट्यांकी’भित्र २ जनाका शव रहेको जानकारी पाउनसाथ इलाका प्रहरी कार्यालय दुहबीबाट इन्स्पेक्टर सागर तिमिल्सिना नेतृत्वको टोली घटनास्थल पुगेको छ ।
घटनाको अनुसन्धानका लागि फरेन्सिक विज्ञसहितको टोली घटनास्थलतर्फ जाँदै छ । धरानको बीपी कोइराला स्वास्थ्य विज्ञान प्रतिष्ठानबाट फरेन्सिक विज्ञ झिकाइएको हो । घटनास्थल इलाका प्रहरी कार्यालय दुहबीबाट करिब २ किलोमिटर पूर्वमा पर्छ ।
डीएसपी खतिवडाले दुवै जनाको शव अहिले घटनास्थलमै रहेको र मृत्युको कारण पत्ता लाग्न बाँकी रहेको बताउनु भयो । उहाँका अनुसार अनुसन्धानपछि मात्रै उनीहरुको हत्या भएको हो कि हैन भनेर पत्ता लाग्ने बताँउनु भयो ।
