दमक,२८ साउन । झापाको मेचीनगर नगरपालिका–१ साडुगौडामा मध्यरातमा गाउँ पसेर जंगली हात्तीले क्षति गरेका छन् ।
हात्तीले घर भत्काइदिनुका साथै घरमा राखिएको अन्न र बाली खाइदिएको प्रहरीले बताएको छ । हात्तीले उपद्रो मच्चाउँदा ४ परिवार मर्कामा परेका छन् । ८८ हजार बराबरको क्षति भएको छ ।
बुधबार राति करिब १२ः३० बजे २ वटा जंगली हात्ती बस्तीमा पसेको प्रहरीले बताएको छ । हात्तीले नर्वु तामाङको भान्सा घरको टिनको छाना भत्काएर करिब २५ हजार रुपैयाँ बराबरको क्षति पुर्याएको इलाका प्रहरी कार्यालय मेचीनगरले बताएको छ ।
त्यस्तै, प्रेम बहादुर भारतीको घरबाहिर राखिएको २ मन धान खाएर करिब ३ हजार रुपैयाँको क्षति गरिदिएको पाइएको छ । सुनिता तामाङ र जितबहादुर मगरको ५–५ कठ्ठामा लगाएको हरियो धानको बोटसमेत खाएर नष्ट गरिदिएको प्रहरीको बताएको छ ।
स्थानीयका अनुसार जंगली हात्तीको गाउँ प्रवेश गर्ने र आतंक मच्चाउने घटना दोहोरिइरहेका छन् । तर, सम्बन्धित निकायले हात्ती रोकथाम र व्यवस्थापनका लागि पर्याप्त उपाय नअपनाउँदा किसानहरू वर्षैभरि जोखिममा बस्न बाध्य रहेको उनीहरु गुनासो छ।
