सुनसरीको धरानमा झोलाभित्र मानिसको शरीरका केही भाग फेला परेको छ। धरान उपमहानगरपालिका–४ स्थित नौकिलोमा बुधबार जेब्रा झोलाभित्र पुरुषको काटिएको टाउको र खुट्टाको भाग भेटिएको थियो। झोलाभित्र मानिसको शरीर भेटिएपछि उक्त स्थानमा बिहीबार बिहान प्रहरी टोली पुगेको थियो।
अनुसन्धानका क्रममा प्रहरीले शव भेटिएको एक किलोमिटर माथि शरीरका अरु भाग र खुट्टा भेटिएको जनाएको छ। टाउको र खुट्टा भेटिएको एक किलोमिटर माथिको जंगलबाट जिउको भाग र दाहिने खुट्टा भेटिएको सङ्घीय प्रहरी इकाई कार्यालय धरानका एसपी भीम दाहालले बताए। बिहान सघीय प्रहरी कार्यालय धरानको तालिमप्राप्त ट्र्याक डगसहित सर्च गर्ने क्रममा जिउको भाग र दाहिने खुट्टा जेब्रा झोलामा नै भेटिएको उनले बताए। ‘शवको पहिचान अझै हुन सकेको छैन, शरीरको सबै भागको अब फरेन्सिक जाँच गछौँ,’ उनले भने, ‘त्यसपछि केही खुल्न सक्छ।’
जङ्गलमा दाउरा खोज्न जाने क्रममा दुर्गन्ध आएको र जेब्रा झोलामा मानिसको खुट्टा बाहिर देखेपछि स्थानीयले प्रहरीलाई खबर गरेका थिए। अहिले इलाका प्रहरी कार्यालय धरान र सङ्घीय इकाई प्रहरी कार्यालय धरानले घटनाको अनुसन्धान गरिरहेका छन्। शवको प्रकृति हेर्दा हत्या गरेर फालिएको हुनसक्ने प्रहरीको अनुमान छ। प्रहरीका अनुसार मृतक अधवैंशे उमेरको रहेको अनुमान गरिएको छ।
घटनास्थलमा परिचय खुल्ने कुनै पनि प्रमाण नभेटिएका कारण पहिचान खुलाउन समस्या भएको संघीय प्रहरीका एसपी दाहालले बताए। उनका अनुसार घटनाबारे अनुसन्धान भइरहेको छ। मृतकको पोष्टमार्टम रिपोर्टपछि केही पत्ता लाग्न सक्ने उनले बताए।
