Search
Close this search box.
"घटना"

सहचालकले गरे सहचालक कै हत्या

 

 

 

विराटनगर : सार्वजनिक सवारी साधनमा सहचालकको काम गर्दै आएका मोरङको केराबारी गाउँपालिका–८ का २६ वर्षीय बाबुराम भट्टराईको हत्यामा संलग्न एक जनालाई प्रहरीले पक्राउ गरेको छ।

भट्टराईको हत्यामा संलग्न भएको आरोपमा केराबारी–३ रामपुरका ३५ वर्षीय कमल लिम्बूलाई प्रहरीले पक्रेको हो। भट्टराई केराबारी–भोगटेनी–रामपुर चल्ने सार्वजनिक बसमा सहचालकको काम गर्थे। उनको हत्यामा संलग्न लिम्बू पनि केराबारी–रामपुर चल्ने अर्को बसका सहचालक रहेको प्रहरीले जनाएको छ।

मोरङ प्रहरीका प्रवक्ता डीएसपी मञ्जील मुकारुङका अनुसार मादक पदार्थ सेवन(मापसे) गरिरहेका बेला विवाद उत्पन्न भएपछि रडले हानेर लिम्बूले भट्टराईको हत्या गरेको प्रारम्भिक अनुसन्धानबाट खुलेको छ। हत्या गरेपछि लिम्बू एक्लैले १ घण्टा परको जंगलमा लगेर शव रुखको जराभित्र लुकाएको खुलेको छ। ‘घटनास्थलबाट काँधमा बोकेर एक घण्टा पर पुर्याउँदै शवलाई रुखको जराभित्र लुकाएर लिम्बू आफ्नो घर फर्किएको पाइयो,’ डीएसपी मुकारुङले भने, ‘बाटोमा दुई ठाउँ बिसाएर लुकाउने ठाउँसम्म शव पुर्याएको खुलेको छ।’

लिम्बूविरुद्ध कर्तव्य ज्यान मुद्दा चलाउन प्रहरीले आइतबार अदालतबाट म्याद थप गरेर घटनाको बाँकी अनुसन्धान अघि बढाउने भएको छ। प्रहरीका अनुसार मापसे गर्ने क्रममा सामान्य विवाद हुँदा लिम्बूले रड प्रहार गर्दा भट्टराई घटनास्थलमै ढलेका थिए। अहिलेसम्मको अनुसन्धानबाट हत्या उनी एक्लैले गरेको खुलेको मुकारुङको भनाइ छ। प्रहरीले भने हत्यामा अरुको पनि संलग्नता रहेको हुनसक्ने आशंका गर्दै अनुसन्धानको दायरा थप फराकिलो पारिएको जनाएको छ।

घरबाट मच्छिन्द्र मेला जान भनेर निस्किएका भट्टराईको शव १२ दिनपछि गत माघ ९ गते चारकोसे जंगलमा ढलेको रुखको जराभित्र भेटिएको थियो। पुस २३ गतेदेखि २९ गतेसम्म लागेको भेला भर्न भनेर उनी घरबाट हिँडेका थिए।

घरबाट मेला हिँडेका भट्टराई गत पुस २७ गतेदेखि हराइरहेका थिए। उनको शव कुहिएर दुर्गन्ध फैलिएको अवस्थामा फेला परेको थियो। आफन्त र परिवारका सदस्यले हत्या गरेर शव लुकाइएको बताउँदै घटनाको सत्यतथ्य पत्ता लगाएर दोषीमाथि कारबाही हुनुपर्ने माग गर्दै आएका थिए।

 

Share:

Facebook
Twitter
Email
WhatsApp