भक्तपुर,२३ असोज।नेकपा एमालेका अध्यक्ष केपी शर्मा ओलीले संसद पुनस्र्थापनाको मुख्य माग लिएर अघि बढ्ने बताउनु भएको छ् । भक्तपुरमा आयोजित कार्यक्रमलाई सम्बोधन गर्दै ओलीले असंवैधानिक सरकारले गरेका हरेक कार्य गलत भएको भन्दै देशलाई लोकतान्त्रिक बाटोमा फर्काउन तत्काल संसद पुनस्र्थापना पहिलो सर्त भएको जिकिर गर्नु भएको छ।
‘फागुन २१ गते पर्खिने बेला छैन । मुलुक अघि बढाउनुपर्नेछ,’ ओलीले भन्नु भयो, ‘संसद पुनस्र्थापना बाहेक अन्य मान्य स्वीकारेर हिँडियो भने देश बर्बाद हुन्छ ।’
उहाँले नागरिकको शान्ति, सुरक्षाको विषयलाई गम्भीरतापूर्वक लिनुपर्ने भन्दै नागरिकको जिउधनको सुरक्षा आफैँले गर्नुपर्ने र त्यसको नेतृत्व एमालेले गर्ने बताउनु भएको छ । उहाँले सरकार चुनाव नगराउने रणनीतिमा हिँडेको समेत आरोप लगाउनु भएको छ ।
दलहरू लोकतन्त्रका सर्जक भएको हुँदा उनीहरूसँगको सहकार्यबिना शासकहरू अघि बढेको उहाँको भनाइ छ । ‘अचानक भुईंफुट्टा तत्त्वहरू सक्रिय भए । राजनीतिक निर्णय गर्न दलहरूलाई सहभागी गराइएन । अमुक ठाउँमा वार्ता गर्नुपर्ने ?,’ ओलीले भन्नु भयो,’यो सरकारका हरेक कदम असंवैधानिक छन् । देशलाई अनिश्चयको बाटोमा हिँडाउन खोजिएको छ । राष्ट्रिय शक्तिहरू एकजुट हुनुको विकल्प छैन ।’ उहाँले देशभित्रका लोकतान्त्रिक शक्तिहरू एक ठाउँमा मिल्नुपर्ने बताँउनु भएको छ।
