काठमाडौं /
पार्टी प्रवेश कार्यक्रममा सहभागी हुन नेकपा (एमाले) का अध्यक्ष तथा पूर्वप्रधानमन्त्री केपी शर्मा ओली पोखरा पुगेका छन् । ओली दिउँसो २ बजेको उडानबाट काठमाडौं फर्कने कार्यक्रम रहेको छ ।
आजै दिउँसो १ बजे प्रतिनिधि सभाको बैठक बस्दैछ । प्रतिनिधि सभामा पेस अमेरिकी सहायता सम्झौता अनुमोदनमा सत्ता गठबन्धनका दल नेकपा (माओवादी केन्द्र) र नेकपा (एकीकृत समाजवादी)ले साथ नदिने भएपछि प्रधानमन्त्री देउवाले एमालेको सहयोग खोजिरहेका छन् ।
यता आजको संसद बैठकसमेत सर्न सक्ने सम्भावनासमेत बढ्दै गएको छ । प्रधानमन्त्री देउवा र एमाले अध्यक्ष ओलीबीच हिजो जस्तै बेलुकी छलफल हुनसक्ने स्रोतले जनाएको छ ।
काँग्रेससँगको बार्ता छोडेर अध्यक्ष ओली पोखरातिर
सत्ता गठवन्धन फुटाएर एमसीसी पास गर्ने रणनीतिमा लागेको नेकपा एमालेका अध्यक्ष केपी ओली पार्टी कार्यक्रममा सहभागी हुन आज पोखरा जाँदैछन् । सरकारको नेतृत्व गरिरहेको नेपाली काँग्रेसँग शुक्रबार समेत बार्ता हुने चर्चा चलिरहेका बेला अध्यक्ष ओली विहान ११ बजे पोखरा जान लागेका हुन् ।
ओली दिउँसो २ बजे काठमाडौं फर्कने तय भएको छ । जनता समाजवादी पार्टीका स्थायी कमिटी सदस्य तथा गण्डकी प्रदेश इन्चार्ज गणेशमान गुरुङसहित विवेकशील साझा पार्टीका नेता कार्यकर्ताहरु पनि आफ्नो पार्टीमा प्रवेश गर्ने कार्यक्रम रहेको एमाले कास्कीले जनाएको छ । आज एमाले र नेपाली कांग्रेसका नेताहरुबीच बार्ता हुने बताइएको थियो ।
प्रमुख प्रतिपक्षी दल एमालेका अध्यक्ष ओली र प्रधानमन्त्री समेत रहेका कांग्रेस सभापति शेरबहादुर देउवाबीच एमसीसी सम्झौता अनुमोदनलगायतका विषयमा छलफल गरी निष्कर्ष निकालिने बताइए पनि अहिलेसम्म वार्ताबारे ठोस समय तय भएको छैन ।
एमालेले एमसीसी पास गर्न आफूहरु तयार रहेको तर त्यसअघि १४ सांसदको पद खारेजी वा सभामुख अग्नि सापकोटालाई हटाउने सर्त मान्नु पर्ने अडान लिएको छ । प्रधानमन्त्री देउवाले यो विषय सर्वोच्च अदालतमा विचाराधिन रहेकाले कुनै निर्णय अहिलेनै गर्न नसक्ने जवाफ दिएका छन् ।
