काठमाडौँ,९ भदौ । जनता समाजवादी पार्टी (जसपा), नेपालले पार्टी निर्देशनविपरीत लुम्बिनी प्रदेश सरकारको पक्षमा मतदान गर्ने आफ्ना तीन प्रदेश सभा सदस्यहरूसँग २४ घण्टाभित्र पुनः स्पष्टीकरण माग गरेको छ।
पार्टी केन्द्रीय कार्यालयले मंगलबार महासचिव डा. सुरेन्द्र कुमार झाको हस्ताक्षर सहित पत्र पठाउँदै प्रदेश सभा सदस्यहरू सन्तोष कुमार पाण्डे, हेमा बेलवासे र भण्डारी लाल अहिरसँग स्पष्टीकरण मागेको हो। यसअघि भदौ १ गते पार्टीले सरकारको विपक्षमा मतदान गर्न ह्विप जारी गरे पनि उहाँहरूले पक्षमा मतदान गर्नु भएको थियो।
पहिलो पटक पेस गरिएको जवाफ चित्तबुझ्दो र सन्तोषजनक नभएको ठहर गर्दै पार्टीले पुनः २४ घण्टे म्याद दिएको हो। पार्टी निर्णय अवज्ञा गरेकोमा अनुशासनको कारबाही किन नगर्ने भन्दै चित्तबुझ्दो जवाफ नआएमा विधानबमोजिम कारबाही प्रक्रिया अघि बढाउने चेतावनी पत्रमार्फत दिइएको छ।
