काठमाडौं,९ भदौ । नेकपा (एमाले) का राष्ट्रियसभा सांसद सोमनाथ पोर्तेलले तीन वर्षीया बालिका गरिमा चौधरीको बलात्कार तथा हत्या प्रकरणमा गृहमन्त्री र प्रहरी प्रशासनबाटै अमानवीय र असंवेदनशील व्यवहार देखिएको आरोप लगाउनुभएको छ।मंगलबार बसेको राष्ट्रियसभा बैठकमा बोल्दै सांसद पोर्तेलले पीडितलाई न्याय दिलाउनु र दोषीलाई कडा कारबाही गर्नु सबैको प्राथमिकता हुनुपर्नेमा राज्य पक्षबाटै इतिहासमै नदेखिएको पाषाणकालीन व्यवहार प्रदर्शन भएको बताउनुभयो।
पीडित परिवार र अभियुक्तको भिडियो सार्वजनिक गरिएको विषयप्रति आपत्ति जनाउँदै उहाँले भन्नुभयो, “एकातिर सिंहदरबारमा गृहमन्त्री भिडियो छायांकन गर्नुहुन्छ, अर्कातिर प्रहरीको निर्देशनमा भिडियो बनाइन्छ। यी दुवै घटनाको ध्येय र संवाद यतिविघ्न कुरुप, विभत्स र हृदयविदारक छ कि यसको परिकल्पनासमेत गर्न सकिन्न।”उहाँले पीडित बालिकाका आमाबुवालाई ‘हामी खुसी छौँ’ भन्न लगाइएको र अर्कातिर अभियुक्तलाई विजयोत्सवझैँ छाती फुलाएर बयान दिन लगाइएको भन्दै यस्ता कार्यले कानुनी राज्यको खिल्ली उडाएको टिप्पणी गर्नुभयो।
