दमक, ३ पुस । इसाइ धर्मका प्रवर्तन यशु ख्रीष्टको जन्मोत्सवलाई फरक तरिकाले मनाउन थालिएको छ । त्यो उदाहरण झापाको दमकस्थित इसाइ समाजको यो कार्यक्रम हो । जहाँ जनवादी गीत संगीतका रुपमा प्रयोग गरिएको श्याम तमोटको शब्दको रामेश र रायनहरुले गाएको ‘गाउँगाउँबाट उठ’ गीत गाएर नेपाललाई बनाउन फेरि सबै उठ्नु पर्ने सन्देश दिइएको छ ।
गोर्खा डिपार्टमेन्ट अगाडि सम्पन्न कार्यक्रमको सुरुवातकै क्रममा राष्ट्रप्रेमले भरिएको ‘यो मन त मेरो नेपाली हो’ गाएपछि ‘गाउँगाउँबाट उठ’ गाएर सहभागीमाझ उर्जा भर्ने काम भएको थियो ।
गीत र नृत्यका सांगीतिक प्रस्तुतिमा केन्द्रित कार्यक्रम ‘गौरादहको बजारैमा’ गीतमार्फत चिनिएका पुराना लोक गायक सीताराम ताजपुरियालाई सम्मान गरेर सृजना क्षेत्रको सम्मानमा जोडिएको छ । गायक ताजपुरियालाई नगद १५ हजार, दोसल्ला र सम्मानपत्रले सम्मानित गरिएको थियो ।
कार्यक्रमकी प्रमुख अतिथि दमक नगरपालिकाकी उप–प्रमुख रेगिना भट्टराई प्रसाईंले लोक गीतसंगीतले समाज, संस्कृति र पहिचान जोड्ने काम गरेको बताउँदै कलाकारको योगदान सधैं स्मरणीय रहने उल्लेख गर्नुभयो ।
कार्यक्रममा उपप्रमुख प्रसाईंकासाथै दमक नगर इसाई समाजका अध्यक्ष हेमन्त सुब्बा, पूर्व अध्यक्ष तथा ख्रीष्टमस विशेष शुभकामना आदान–प्रदान तथा सांगीतिक कार्यक्रमका संयोजक आकाश थुलुङ, सल्लाहकार राजकुमार राई लगायतले गायक ताजपुरियालाई सम्मान गर्नुभएको थियो ।
सो अवसरमा प्रमुख वक्ताका रुपमा रेभ डाक्टर शामुयल संग्राम राईले यशु ख्रीष्ट र बाइबलका बारेमा प्रवचन दिनु भएको थियो ।
