Search
Close this search box.

झापा गोल्डकपः सातदोबाटो क्वार्टर फाइनलमा  

 

 

बिर्तामोड  टाइब्रेकरमा भाग्यमानी सावित हुँदै सातदोबाटो युथ क्लब झापाको बिर्तामोडमा शनिबारबाट सुरु भएको पाँचौँ संस्करणको झापा गोल्डकपको क्वार्टर फाइनलमा प्रवेश गरेको छ ।

जावलाखेल युथ क्लबलाई टाइब्रेकरमा ४–२ गोलअन्तरले पराजित गर्दै सातदोबाटोले क्वार्टर फाइनलको यात्रा तय गरेको हो । भर्खरै सम्पन्न ‘ए’ डिभिजन लिगमा जावलाखेलसँग व्यहोरेको हारको बदला सातदोबाटोले झापा गोल्डकपमा लिएको छ । लिगमा सातदोबाटोले जावलाखेलसँग २–० गोल अन्तरले पराजय व्यहोरेको थियो ।

टाइब्रेकरमा जावलाखेलका लागि विदेशी खेलाडी जुनियर र सुरजजीउ ठकुरीले प्रहार गरेको बल सातदोबाटोका गोलरक्षक अभिषेक बरालले रोक्न सकेनन् । जावलाखेलका राजेन्द्र रावल र गौरव श्रेष्ठको प्रहार विपक्षी गोल रक्षक बरालले विफल गरेका थिए ।

सातदोबाटोका आकाश बुढामगर, प्रशान्त अवस्थी, कप्तान मानबहादुर तामाङ र विदेशी खेलाडी अजयी मार्टिनले टाइब्रेकरमा गोल गर्न सफल भए ।

बिर्तामोडस्थित डोमालाल राजवंशी रङ्गशालामा भएको उद्घाटन खेलको तेस्रो मिनेटमै सातदोबाटोका लागि अजयी मार्टिनले गोल गरेका थिए । निरज चौधरीले डिबक्समा दिएको पासलाई सदुपयोग गर्दै मार्टिनले ‘वान टच’ मा गोल गरे । खेलको १३ औँ मिनेटमा जावलाखेलले १–१ को बराबरी गर्यो । विदेशी खेलाडी निकोलस फर्नान्डेजको क्रसमा जुनियरले टिमको लागि व्यक्तिगत दोस्रो गोल गरे । खेलको ३५ औँ मिनेटमा जुनियरले दोस्रो गोल गर्दै खेललाई २–१ को अन्तरमा पुर्याए ।

पहिलो हाफ २–१ मा टुङ्गिए पनि दोस्रो हाफको आठौँ मिनेटमा सातदोबाटोका आशिष राईले गोल गर्दै खेल बराबरीमा पारे । निरज चौधरीको पासमा राईले जावलाखेलका गोल रक्षक ईश्वर गुरुङ बिट हँुदा गोल गर्न सफल भए । खेल अवधिभर दुवै टिमका खेलाडीले थप स्कोर निकाल्न खोजे पनि सफल हुन भने सकेका थिएनन् ।

खेलपछि पोष्ट म्याच कन्फ्रेन्समा कुरा गर्दै जावलाखेलका प्रशिक्षक किशोर केसीले पूरा समय नखेलाउनु आयोजकको कमजोरी भएको बताए । उनले ९० मिनेट खेलेपछि समय थपेर खेलाउनु पर्नेमा आयोजकले ८० मिनेट खेलाएर सोझै टाइब्रेकरमा लगेको बताए ।

सातदोबाटोका प्रशिक्षक उज्वल मानन्धरले खेल अवधिमै जित निकाल्न खोजेको भए पनि त्यो सम्भव हुन नसक्नु टिमको कमजोरी भएको बताए । सातदोबाटोमा कोही स्टार प्लेयर नभएको जानकारी दिँदै सशक्त टिम भएका कारण यो प्रतियोगिताको टाइटल उचाल्नेमा आफू विश्वस्त रहेको मानन्धरले बताए ।

खेलको म्यान अफ दी म्याच सातदोबाटोका गोल रक्षक अभिषेक बराल घोषित भए । उनले नगद ९ हजार ९ सय ९९ नगद पाए । आज (आइतबार)को दोस्रो खेल नेपाल पुलिस क्लब नेपाल पुलिस क्लब र सङ्कटाबीच हुने आयोजकले जनाएको छ ।

३० फागुनसम्म हुने प्रतियोगिताको विजेताले नगद १२ लाख ५५ हजार र उपविजेताले ६ लाख ५ हजार पुरस्कार पाउने आयोजक समिति अध्यक्ष विनोद बस्नेतले जानकारी दिए ।

प्रतियोगितामा नेपालका ८ र भारतका दुई क्लबको सहभागिता छ । पाँचौँ संस्करणको झापा गोल्डकपको उद्घाटन पूर्वप्रधानमन्त्री तथा एमाले अध्यक्ष केपी शर्मा ओलीले गरे । झापा गोल्डकपका सदस्यसमेत रहेका ओलीले डोमालाल राजवंशी रङ्गशालाको विकास र खेलकुदको विकासमा सहयोग गर्ने प्रतिबद्धता जनाए ।

 

Share:

Facebook
Twitter
Email
WhatsApp