दमक, १७ पुस । झापाका विभिन्न स्थानमा जंगली हात्ती प्रवेश गरी घर तथा अन्नमा ठूलो क्षति पु¥याएका छन्। जिल्ला प्रहरी कार्यालय झापाका अनुसार गएराति करिब १ बजे कमल गाउँपालिका वडा नम्बर ३ बगाने टोलमा तीन वटा जंगली हात्तीको हुल प्रवेश गरेको थियो।
हात्तीको हुलले ५२ वर्षीय गणेश बस्नेतको बाँसको टाटी बेराले बनेको टिनको छानो भएको भुइँ घरमा आंशिक क्षति पुर्याउनुका साथै बाँसको टाटी बेरा र फुसको छानो भएको भान्सा घर पूर्ण रूपमा क्षति पुर्याएकाे छ।
त्यसक्रममा घरभित्र रहेको चार मन धान, चार मन मकैको पिठो, लत्ताकपडा, भाँडाकुँडा तथा खाटसमेत गरी करिब एक लाख रुपैयाँ बराबरको क्षति भएको प्रहरीले जनाएको छ। यसैगरी सोही राति करिब २ बजे भद्रपुर नगरपालिका वडा नम्बर ७ डाँफे चोकमा जंगली हात्ती प्रवेश गरी ऋषि भट्टराईको इँटा र टिनको छानो भएको एकतले पक्की घरको पूर्वतर्फको किचनको इँटाको पर्खाल भत्काएको छ।
यसबाट करिब २२ हजार रुपैयाँ बराबरको क्षति भएको छ। त्यस्तै राति करिब ४ बजे बिर्तामोड नगरपालिका वडा नम्बर ८ किशनभिट्टामा एक जंगली हात्तीले टंक बरायलीको टाटी बेरा र टिनको छानो भएको एकतले कच्ची घरको टाटी भत्काएको छ। हात्तीले भण्डार कोठाभित्र रहेको ८ सय किलो धान र १ सय किलो चामल खाई करिब ४५ हजार रुपैयाँ बराबरको अन्न नष्ट गरी जंगलतर्फ भागेको प्रहरीले जनाएको छ।
