झापा,२२ पुस ।आज समयमा जिल्ला झापा बिर्तामोड नगरपालिका वडा नम्बर १, सूर्यनगर टोलस्थित काली मन्दिर नजिकै रहेको अजय राजवंशीको घरको कोठामा लागुऔषध कारोबार भइरहेको भन्ने विशेष सूचनाको आधारमा प्रहरीले छापा मारेको हो।
इलाका प्रहरी कार्यालय अनारमनीबाट खटिएको प्रहरी निरीक्षक प्रबिण श्रेष्ठको नेतृत्वमा गएको टोली र लागुऔषध नियन्त्रण ब्युरो काकरभिट्टाबाट खटिएको संयुक्त टोलीले चेकजाँच गर्दा सोही स्थानका करिब ४० वर्षका अजय राजवंशीको साथबाट तथा घरको कोठाभित्र लुकाइछिपाइ राखिएको लागुऔषध फेला परेको प्रहरीले जनाएको छ।
प्रहरीका अनुसार ब्राउन सुगर जस्तो देखिने खैरो लिसाइलो पदार्थ डिजिटल तराजुमा तौल गर्दा प्लास्टिकसहित १३१ ग्राम ३६० मिलिग्राम र प्लास्टिक बाहेक १२३ ग्राम १८० मिलिग्राम बरामद गरिएको छ।
त्यसैगरी नगद नेपाली रुपैयाँ दुई लाख सडसठ्ठी हजार, भारतीय रुपैयाँ उनन्तिस हजार पाँच सय, एक थान डिजिटल तराजु, एक थान कैँची, एक थान चक्कु तथा दुई थान मोबाइल फोन समेत फेला परेको प्रहरीले जानकारी दिएको छ।
