काठमाडौँ,२३ पुस । माघ ११ गते हुने राष्ट्रिय सभा निर्वाचनका लागि नेपाली कांग्रेस, नेकपा एमाले र जसपा नेपालबिच गठबन्धन भएको छ । सहमति बमोजिम तीन दलले उम्मेदवार तय गरिसकेको बताएका छन् ।
कांग्रेसले ९ सिटका लागि उम्मेदवार सिफारिस गरिसकेको छ । पार्टीले कोशी प्रदेशबाट अन्य क्लस्टरमा सुनिल थापालाई उम्मेदवार बनाइएको छ । उहाँ पार्टीका पूर्वसहमहामन्त्री र बहालवाला कार्यसम्पादन समिति सदस्य हुनुन्छ । थापाले राष्ट्रियसभामा उम्मेदवार बन्नका लागि राष्ट्रपतिको प्रमुख राजनीतिक सल्लाहकारबाट केही दिनअघि राजीनामा दिनु भएको थियो । थापा पूर्वप्रतिनिधिसभा सदस्य र पूर्वमन्त्री पनि हुनुन्छ । उहाँ पूर्वप्रधानमन्त्री सूर्यबहादुर थापाका छोरा पनि हुनुन्छ ।
त्यस्तै कांग्रेसले लुम्बिनी प्रदेशको अन्य क्लस्टरमा पार्टीका केन्द्रीय सदस्य चन्द्रबहादुर केसीलाई उम्मेदवार बनाएको छ । केसी गुल्मीका पार्टीका पुराना नेता हुनुन्छ ।त्यस्तै कर्णालीबाट कांग्रेसले अन्य क्लस्टरमा पार्टीका कर्णाली प्रदेश सभापति ललितजंग शाहीलाई उम्मेदवार बनाएको हो ।
गण्डकी प्रदेशको अन्य क्लस्टरमा काँग्रेसले पार्टीको शुभेच्छुक संस्था प्रजातन्त्रवादी प्राध्यापक संघका सभापति जगत तिमिल्सिनालाई उम्मेदवार बनाएको हो । मधेस प्रदेशको अपांगता अल्पसंख्यक क्लस्टरमा काँग्रेसले नेपाल विद्यार्थी संघका पूर्वअध्यक्ष रञ्जित कर्णलाई उम्मेदवार बनाएको हो । कर्ण यसअघि संविधानसभामा पनि समानुपातिकबाट सांसद बन्नु भएको थियो ।
नेकपा एमालेले ८ जना उम्मेदवारको टुंगो लगाएको छ । जसअनुसार एमालेले कोशी प्रदेशमा रोशनी मेचे र सोम पोर्तेललाई उम्मेदवार बनाएको हो । यस्तै मधेस प्रदेशबाट रेखा झा, बागमतीबाट प्रेम दंगाल र गण्डकी प्रदेशमा सम्झना देवकोटाले उम्मेदवारी दिने निर्णय एमालेले गरेको हो । यसैगरी एमालेले लुम्बिनीमा रामकुमारी झाँक्री, कर्णालीमा मीना रखाल र सुदूरपश्चिममा लीला भण्डारीलाई उम्मेदवार बनाउने निर्णय गरेको एक नेताले बताउनु भयो । उम्मेदवारहरुले आजै उम्मेदवारी दर्ता गराउँदैछन् ।
जसपा नेपालले भने महन्थ ठाकुरलाई राष्ट्रिय सभा सदस्य निर्वाचनमा उम्मेदवार बनाएको हो ।
