काठमाडौँ,२९ पुस । नेपाली कांग्रेसको विशेष महाधिवेशन अन्तर्गत नयाँ नेतृत्व चयनका लागि आजै राति ९ बजेदेखि मतदान हुने भएपछि महाधिवेशन स्थल भृकुटीमण्डपमा सुरक्षा व्यवस्था कडा पारिएको जनाइएको छ ।
निर्वाचन कार्यतालिका सार्वजनिक भएसँगै भृकुटीमण्डप क्षेत्रमा सुरक्षाकर्मीको संख्या बढाइएको छ। सम्भावित अवाञ्छित गतिविधि रोक्न सुरक्षाकर्मी परिचालन गर्दै प्रवेश तथा आवतजावतमा निगरानी कडा बनाइएको बताइएको छ ।
निर्वाचन समितिले मतदाता नामावली प्रकाशन, मतदान, मतगणना तथा मतपरिणाम घोषणासम्मको कार्यतालिका सार्वजनिक गरेको छ । समितिका अनुसार सभापति पदका लागि उम्मेदवारी दर्ता गर्न ३० हजार रुपैयाँ शुल्क तोकिएको छ । उपसभापति र महामन्त्री पदका लागि २५ हजार तथा सहमहामन्त्री पदका लागि २० हजार रुपैयाँ शुल्क निर्धारण गरिएको जनाइएको छ ।
