पथरी, २९ पुस। उत्तरपूर्वी मोरङको पथरी शनिश्चरे नगरपालिकास्थित पथरी बजार क्षेत्रमा चारलेन मात्रको सडक बन्ने प्रसंग अघि बढेपछि स्थानीयले ६ लेनकै सडक बन्नुपर्ने माग अघि सारेका छन् ।
सडकको ८२ मिटर क्षेत्रमा पर्ने संरचना हटाउनका लागि १ नम्बर वडा कार्यालयले ३५ दिने सूचना जारी गर्ने र एशियन हाइवे परियोजनालाई ५० मिटर अर्थात ६ लेनकै सडक निर्माणमा ध्यानाकर्षण गराइने सर्वपक्षीय भेलाले निर्णय गरेको छ । वडाअध्यक्ष भीमकुमार राईको अध्यक्षताको दल तथा विभिन्न सरोकारवालाहरुको भेला सम्पन्न भएको छ । भेलाले सर्वपक्षीय १३ सदस्यीय समितिले गत भदौमा कार्यालयसँग भएको सहमति अनुरुप सडक परियोजनाको कार्यालय इटहरीमा ध्यानाकर्षण गराउने निर्णय भएको समितिका संयोजक एवम् वडाअध्यक्ष राईले जनाउनु भयो ।
समितिका सदस्यहरुमा पथरी उद्योग वाणिज्य संघका अध्यक्ष दीपक बस्नेत, एमालेकातर्फबाट पूर्व वडाध्यक्ष बाबुराम एङ्देन, वडा सदस्य पूर्णबहादुर कार्की, कांग्रेसका दुर्गाप्रसाद भट्टराई, नेकपाका तुलसी ढकाल, रास्वपाका मोहनकुमार श्रेष्ठ, प्रभावित क्षेत्रसहितका प्रतिनिधिहरु विजय डाँगी, राजेन्द्र भण्डारी, रुपनारायण भट्टराई, राजन तिम्सिना, विजय श्रेष्ठ, शान्ति सामुदायिक वनका कुलमणि गुरुङ रहनु भएको छ ।
नगरपालिकाको कार्यपालिका बैठकमा वडाअध्यक्ष राईले ५० मिटर चौडाईको सडक निर्माणमा ध्यानाकर्षण गराउन समिति बनेको कुराको जानकारी गराउनुभएको थियो । कार्यपालिका बैठकले पनि सो विषयमा सडक कार्यालयलाई ध्यानाकर्षण गराउने तथा जिरीखिम्तीको सडकको नक्सा र सडकको अवस्थितिको समस्या, त्यहाँको डाँस खोला क्षेत्रमा टनेल पुल निर्माण सम्बन्धी विषयमा व्यापक छलफल गरेको थियो ।
बैठकले योजना तथा कार्यक्रम संशोधन, जग्गा वर्गीकरण, नगरको वधशाला र नाट्यशाला निर्माणका सन्दर्भमा छलफल गरेको छ ।
अघिल्लो बैठकले नगरपालिकाको नगरसभा माघ ११ गते गर्ने निर्णय गरेको भए पनि सोही दिन राष्ट्रिय सभाको निर्वाचन तय भएकाले नगरसभाको मिति परिवर्तन गरी माघ १४ गते गर्ने निर्णय गरिएको छ ।
