दमक, २९ पुष । पूर्व प्रधानमन्त्री तथा एमाले अध्यक्ष केपी शर्मा ओली र रास्वपाबाट उम्मेद्वारी दिने चर्चामा रहेका बालेन्द्र शाहको सम्भावित भिडन्तले राष्ट्रिय राजनीतिमा तातेको झापा क्षेत्र नम्बर–५ मा अब नयाँ परिवर्तनकारी शक्ति पनि मैदानमा उत्रिएको छ।
आगामी फागुन २१ गते हुने प्रतिनिधि सभा निर्वाचनका लागि राष्ट्रिय परिवर्तन पार्टीले यही क्षेत्रबाट आफ्नो उम्मेद्वार सार्वजनिक गरेको हो।
पार्टीको तर्फबाट सविन चाम्लिङ राई उम्मेद्वार बन्ने घोषणा बिर्तामोडमा आयोजित पत्रकार सम्मेलनमार्फत गरिएको हो।
कमल गाउँपालिका निवासी तथा पेशाले फोटो पत्रकार रहेका राईले झापा–५ लाई अब पुराना शक्ति र नयाँ पुस्ताबीचको मात्र होइन, वैकल्पिक र परिवर्तनकारी एजेन्डाको पनि चुनावी मैदान बनाउने दाबी गर्नुभयो ।
पार्टी अध्यक्ष राजेश पोर्तेलको नेतृत्वमा अघि बढेको राष्ट्रिय परिवर्तन पार्टीले उज्यालो नेपाल पार्टीसँग सहकार्य गरेर यो पार्टिले प्रत्यक्ष निर्वाचित राष्ट्रपति प्रणाली, भ्रष्टाचार शून्य शासन व्यवस्था जस्ता एजेन्डालाई मुख्य चुनावी मुद्दा बनाएको जनाएको छ।
कार्यक्रममा पार्टीका समानुपातिक उम्मेद्वार तथा शहीद–घाइते तर्फका संयोजक प्रकाश भट्टराईले राष्ट्रिय परिवर्तन पार्टीलाई जेन–जी, शहीद र घाइतेको साझा आवाजको रूपमा प्रस्तुत गर्नुभयो ।
त्यस्तै, नेतृ अञ्जना राईले देशभित्रै रोजगारी सिर्जना गर्दै विदेश पलायन रोक्ने नीति पार्टीको प्राथमिकता रहेको पत्रकार सम्मेलनका क्रममा बताउनु भयो ।
ठूला र चर्चित अनुहारहरूको सम्भावित प्रतिस्पर्धाबीच राष्ट्रिय परिवर्तन पार्टीले बाँसुरी चुनाव चिन्हसहित “सबैको अपनत्व हुने राजनीति” का साथ चुनावी मैदानमा उत्रिएको जनाएको छ।
