पथरी, ३० पुस । सृजना क्षेत्रमा उर्बर उत्तरपूर्वी मोरङको पथरी शनिश्चरे नगरक्षेत्रमा आवश्यकता खड्किएको नाट्यशाला निर्माणका लागि प्राप्त भएपछि सर्जकहरु उत्साहित भएका छन् ।
स्थानीय समाजसेवी हिरा तिम्सिनाले वडा नम्बर २ मा अवस्थित साविक मधुमल्ला ६ ध, कित्ता नम्बर ६४७ को ४० लाख बढी मूल्यपर्ने ४ कठ्ठा जग्गा निःशुल्क प्रदान गरेपछि सर्जकहरुमा उत्साह थपिएको हो । २ नम्बर वडाध्यक्ष नैना राईको समन्वयमा नाट्य गतिविधिमा सक्रिय ‘शब्द थिएटर’का लागि जग्गा व्यवस्थापन हुन पुग्यो । शब्द थिएटरले जग्गास्थलमा ‘नाट्यशाला निर्माणस्थल’को बोर्ड राखेर सर्जकहरुमाझ जानकारीमूलक कार्यक्रम राख्यो ।
कार्यक्रममा बोल्दै नगरपालिकाको उपसमितिका रुपमा रहेको कला साहित्य प्रवद्र्धन समितिका पूर्व अध्यक्ष एवम् वर्तमान कार्यपालिका सदस्य वीरध्वज शिवाले लामो समयपछि यसखाले अवसर प्राप्त हुनु ठूलो कुरा भएकाले खुसी व्यक्त गर्नुभयो ।
जनप्रतिनिधिको पहलमा भएको जग्गास्थललाई अब नाट्यसंगै सबैखाले सृजनाको थलोका रुपमा सो स्थललाई विकास गर्नुपर्ने सुझाव समेत दिनुभयो ।
कार्यक्रममा जग्गादाता तिम्सिनाले सृजना क्षेत्रको प्रवद्र्धन गर्नुपर्ने दायित्व बुझेर आफूले सहयोग गरेको जानकारी गराउनु भयो ।
जग्गाप्राप्तिपछि सो स्थलमा नाट्यशाला निर्माणका लागि आर्थिक व्यवस्थापनको खाँचो रहेको जनाउँदै थिएटर अध्यक्ष अशोककुमार राईको अगुवाईका सर्जकहरुको टोली पथरी शनिश्चरे नगरपालिका कार्यालय पुग्यो । टोलीले नगर प्रमुख मोहनप्रसाद तुम्बापोलाई तत्कालका लागि नाट्यशाला निर्माणस्थल पुर्न र घेराबारा गर्न आर्थिक व्यवस्थापन मिलाउन अनुरोध ग¥यो । आधुनिक सुविधा सम्पन्न नाट्यशाला निर्माणका लागि नगरले आफूले र माथिल्ला निकायमा पहल गर्न समेत जोड दियो ।
नगर प्रमुख तुम्बापोले नगरले पनि सकेको सहयोग गर्ने र यसलाई प्रदेश र संघमा नगरकोतर्फबाट योजनाका लागि पहल गर्ने वचन दिनु भयो ।
जग्गाको तत्काल तारजालीसहितको घेराबाराका लागि २ नम्बर वडा कार्यालयले २ लाख रुपैयाँ बजेट छुट्याएको छ । वडाले नै सो स्थलको नापजाँच गरेर स्टिमेट समेत तयार गरेको छ ।
जनप्रतिनिधिबाट सृजनाको मर्म बुझेर यसखाले पहल थालिनुलाई देश विदेशका सर्जकहरुले खुसी व्यक्त गरेका छन् ।
