मोरङ — विराटनगर २ स्थित सुधार गृह ‘स्पर्श नेपाल’बाट मंगलबार भागेका चार जनामध्ये एक युवक बुधबार सिंघीया खोलामा मृत फेला परेका छन् । सुनसरी गढी गाउँपालिका २ घर भइ धरान बस्दै आएका २६ वर्षीय दिलेन्द्र परियार मृत अवस्थामा फेला परेका हुन् । उनीसँगै भागेका विराटनगरका रोहित कामत र दिनेश बस्नेत परिवारको सम्पर्कमा पुगेको जिल्ला प्रहरी मोरङका प्रमुख जनार्दन जीसीले बताए ।
उनीहरुमध्ये धरानका निशान धमलालाई प्रहरी र सुधार केन्द्रका सुरक्षाकर्मीले नियन्त्रणमा लिएका थिए । सुधार गृहबाट भागेका उनीहरु सिंघीया खोला तर्ने क्रममा परियार खोलामा हामफालेर बेपत्ता भएका थिए । खोजी गर्ने क्रममा बुधबार उनी मृत फेला परेको प्रहरीले जनाएको छ ।
लागूऔषध दुर्व्यसनमा लागेका चारै जनालाई परिवारजनले सुधारका लागि महिना दिनअघि सुधार केन्द्रमा राखेका थिए । मृतक परियारका बुबा दिलीपकुमार परियारले सुधार केन्द्रको लापरबाहीका कारण छोराको मृत्यु भएको आरोप लगाएका छन् । ‘छोरालाई फागुन १ गतेदेखि मासिक ५० हजार शुल्क बझाउने गरी सुधार गृहमा राखेका थियौं,’ उनले भने, ‘सुधारका लागि राखेको व्यक्ति भागेर मृत्यु भएको भन्नु सुधार गृहको लापरबाही हो । त्यसैले सुधार गृहका संचालकलाई कारबाही हुनुपर्छ ।’
भागेको समयमा जानकारी नगराउने सुधार गृहका सञ्चालकलाई कारबाहीको दायरामा ल्याएर न्याय प्रदान गरिनुपर्ने दिलीपको माग छ । सुधार केन्द्र रेखदेखमा खटिएका व्यक्तिहरुको पनि लापरबाही रहेको उनको आरोप छ ।
सुधार गृह सञ्चालकलाई कारबाहीको दायरामा नल्याएसम्म शव नबुझ्ने परिवारजनको अडानमा छ । प्रहरीले शव पोस्टमार्टमका लागि कोसी अस्पताल लगेको छ ।
सुधारगृह सञ्चालक सञ्जीव खड्काले सरसफाई भइरहेको समयमा झुक्याएर चारै जना फरार भएकाले सुधार गृहको लापरबाही भन्न नमिल्ने दाबी गरे । उनीहरु फरार भएपछि लखेटेर एक जनालाई समात्न सफल भएको अवस्थामा पनि लापरबाही भन्न नमिल्ने उनको भनाइ थियो । घटनाबारे अनुसन्धान भइरहेको प्रहरी उपरीक्षक जीसीले बताए ।
