ताप्लेजुङ्/ कञ्चनजंघा संरक्षण क्षेत्रको अम्जिलेसामा डढेलो लागेको छ । त्यहाँको वनमा लागेको डढेलोको राप र धुँवा घुन्सासम्म पुगेको घुन्साका डण्डु शेर्पाले जानकारी दिनुभयो । बिहीबार दिउँसोदेखि लागेको डढेलोले एक घर जलेको खबर प्राप्त भएको कञ्चनजंघा संरक्षण क्षेत्र व्यवस्थापन परिषद्का अध्यक्ष खगेन्द्र फेम्वु लिम्बूले बताउनुभयो ।
उहाका अनुसार अरु घर जोगाउनका लागि स्थानीयलाई सचेत गराइएको छ । डढेलो नियन्त्रणभन्दा बाहिर रहेको उनले बताए । त्यहाँ आधा दर्जन घर रहेको उहाले जानकारी दिनुभयो । धेरै क्षति हुन नदिन ग्याब्ला, फले र घुन्साका बासिन्दालाई ओरालो झर्न र सेकाथुम, जौवारी र लेलेपको बासिन्दालाई उकालो जान भनिएको उहाले बताउनुभयो ।
चारैतिरबाट घेरेर अग्निरेखा कोरे नियन्त्रणमा लिन सहज हुने उहाले बताउनुभयो । संरक्षण क्षेत्रका अधिकृत रमेशकुमार यादव दुई÷तीन वर्षदेखि नलागेको जंगलमा डढेलो लागेकाले चुनौती भएको बताउनुभयो ।
