पथरी, ७ चैत । उत्तरपूर्वी मोरङको पथरी शनिश्चरे नगरपालिका १ स्थित पथरी बजार क्षेत्रमा ५० मिटर चौडाइको सडक निर्माणका लागि स्थानीयले सडक पक्षकासाथै नगरपालिका कार्यालयका प्रतिनिधिलाई सहभागी गराई सडक क्षेत्र खाली गर्ने अभियान थालेका छन् ।
जस अन्तर्गत सडकको दुबैतर्फ गरी २५÷२५ मिटर अर्थात कुल साढे ८२ फिट क्षेत्र खाली गर्न थालिएको २ दिने नाँपजाँच कार्य आज सम्पन्न गरिएको छ ।
स्थानीयले संघर्ष समिति समेत खडा गरेर ५० मिटरकै सडक निर्माणको दबाब दिन थालेपछि पथरी शनिश्चरे नगरपालिका कार्यालयले पनि सडकको क्षेत्राधिकार साढे ८२ फिट चौडाई खाली गर्ने विषयमा सरोकारवालाहरुसँग छलफल अघि बढाएको थियो । पहिलेको स्टिेमेटमा ५० मिटरको सडक निर्माणको योजना नरहेको अवस्थामा स्थानीयको दबाब बढ्यो । स्थानीयले नै पहल गरेर साढे ८२ फिट क्षेत्र खाली गरेपछि मात्र सडक परियोजनाले सडक बढाइदिने जनाएपछि संघर्ष समितिले नगरपालिका र सडक परियोजनाका समेत प्रतिनिधि राखेर नाँचजाँच गरेको हो । नापजाँचपछि स्थानीय सडक क्षेत्र खाली गर्न तयार रहेको संघर्ष समिति संयोजक बाबुराम एङ्देनले जनाउनु भयो ।
पथरी बजारमा सडकको साढे ८२ फिट चौडाईको क्षेत्राधिकार खाली हुन नसक्दा ४४ मिटर चौडाईको मात्र सडक बन्ने भएपछि भविष्यका लागि सडक क्षेत्रको पूर्णरुपमा प्रयोग गरी ५० मिटरकै सडक बन्नु पर्ने आवाज उठाउँदै आएको अवस्था छ । यसक्रममा माघ ११ गते वडा नम्बर १ का वडाअध्यक्ष भिमकुमार राईको संयोजकत्वको राजनीतिक दलसहितको सर्वपक्षीय टोलीले काँकडभिट्टा –लौकही सडक आयोजना पश्चिम खण्ड इटहरीमा ५० मिटर सडक निर्माणको आफ्ना माग अघि सारेको थियो ।
सरकारको नीति अनुसार साविकदेखि नै सडक क्षेत्रमा पर्दै आएको साढे ८२ फिट क्षेत्रमा पर्ने संरचना हटाउनका लागि १ नम्बर वडा कार्यालयले ३५ दिने सूचना जारी गरिसकेको थियो ।
