पथरी, १६ चैत । खानपान र पर्यावरणीय असरले मानिसहरुमा क्यान्सर जस्ता जटिल रोगहरु बढ्दै गएका छन् । यही अवस्थालाई दृष्टिगत गरी मोरङको उर्लाबारीस्थित दुईवटा संस्थाको सहकार्यमा यो बेला क्यान्सर तथा गुप्तरोगको खोजी र उपचार अभियान अघि बढेको छ ।
युनिभर्सल युथ ग्रुप र हाम्रो उन्नत प्राङ्गारिक मल तथा शिवशक्ति वायोटेक कम्पनीको सहकार्यमा यसबेला कोशी प्रदेशका पहाडी जिल्लामा स्वास्थ्य अभियान सञ्चालित छ । जिल्ला जिल्लामा कार्यक्रमको संयोजन भनें जिल्ला सहकारी संघमार्फतहुँदै आएको छ । जस अन्तर्गत पछिल्लो पटक इलाम, पाँचथर, ताप्लेजुङ र तेह्रथुम जिल्लामा पहिलो चरणको जानकारीमूलक कार्यक्रम सम्पन्न भयो । जहाँ सहकारी संस्थामा आवद्धहरुलाई प्रतिनिधिमूलक रुपमा भेला गराई वडा वडामा विशेषगरी महिलाको पाठेघरको मुखमा हुने क्यान्सर र गुप्तरोग सचेतना कार्यक्रम सञ्चालन हुनेछ । त्यसपछि निःशुल्क परीक्षण शिविर कार्यक्रम सञ्चालन गरिँदै आएको युनिभर्सल युथ ग्रुपका अध्यक्ष सुनील धिमालले जनाउनु भयो ।
मानिस स्वस्थ रहन भान्सा स्वस्थ रहनु पर्ने हुन्छ । हाल रासायनिक बस्तुको अध्याधिक प्रयोगले दुषित बनेको भान्सा सुधार्न उत्पादनमै सुधार ल्याउने एउटा महत्वपूर्ण उपायका रुपमा प्रांगारिक मलको प्रयोगको आवश्यकता कार्यक्रममा जोडिएको छ । गोबर, जुतो, सुली, पिना लगायतका १२ तत्व मिलाएर बनाएको मलको महत्व झन बढ्दै गएको हाम्रो उन्नत प्राङ्गारिक मल तथा शिवशक्ति वायोटेक कम्पनीका प्रवन्धक राजीव खड्काले बेलिबिस्तार लगाउनु भयो ।
आफन्त रविना धिमालको क्यान्सरका कारण २२ वर्षको उमेरमा निधन भएको घटनाले पिरोलिएर सुनीलले २०७५ सालमा खडा गर्नुभएको संस्थाको स्वास्थ्य अभियानको माग बस्ती बस्तीमा बढेको छ ।
यही मागलाई दृष्टिगत गरी मधेश प्रदेशका केही जिल्लामा समेत यसखाले कार्यक्रम सञ्चालन भएको छ । यसका साथै कोशीका पहाडी जिल्ला भोजपुर, संखुवासभा, तेह्रथुम, धनकुटा तथा इलाम, पाँचथर र ताप्लेजुङमा कार्यक्रम जारी छ । ती जिल्लामा रोग पहिचान भइ उपचारको क्रम अघि बढेको सहकारी संघ कोशी प्रदेश सदस्य एवम् संघका तेह्रथुम जिल्ला अध्यक्ष फौदबहादुर सुवेदीले तथ्याङ्क समेत प्रस्तुत गर्नुभयो ।
