सडकको दुरावस्था र सवारीसाधनको चापः दुर्घटनाको कारक

झापा/ सडकको दुरावस्था तथा सवारीसाधनको चाप दिनप्रतिदिन बढेसँगै पछिल्लो समय दुर्घटनाको संख्या बढ्दै गएको छ । ट्राफिक प्रहरीले दुर्घटना न्यूनीकरणका लागि विभिन्न कार्यक्रम सञ्चालन गरे पनि सडकको दुरावस्था, सवारीसाधनको चाप बर्षेनि बढ्नु, चालकको लापरवाही लगायतका विभिन्न कारणले दुर्घटनाको संख्या बढ्दै गएको प्रहरीको तथ्यांकमा उल्लेख गरेको छ ।

दिनप्रतिदिन बढ्दै गएको सवारी दुर्घटनाका कारण नेपालका कतिपय सडक ‘डेथ–जोन’ बन्दै गएका छन् । झापामा पनि कति पय स्थानमा दुर्घटना ग्रस्त क्षेत्रका रुपमा विभाजन गरेर ट्राफिक प्रहरीले सचेतना मुलक बोर्डहरु राखेको छ । जिल्ला ट्राफिक प्रहरी कार्यालय झापाले दुर्घटना न्यूनीकरणका लागि ट्राफिक सचेतनामूलक कार्यक्रम सञ्चालन गरे पनि चालकको लापरवाही तथा सडकको दुरावस्थाका कारण दुर्घटना न्यूनीकरण प्रभावकारी बन्न नसकेको ट्राफिक प्रहरी निरीक्षक निशेष चापागाईले बताउनु भयो ।

सवारी दुर्घटना न्यूनीकरणका लागि ट्राफिक प्रहरीले समुदाय स्तर तथा विद्यालय स्तरसम्म पुगेर ट्राफिक सचेतना सम्बन्धी कार्यक्रम सञ्चालन गरिरहेको ट्राफिक प्रहरी निरीक्षक चापागाईंको भनाइ छ । सवारी दुर्घटनामा दुई पाङ््ग्रे सवारीको दुर्घटना धेरै हुने गरेको जनाइएको छ । सवारी दुर्घटना कै कारण पछिल्लो तीन वर्षमा झापामा दुई सय चालिस जनाले ज्यान गुमाएका छन् ।

आर्थिक वर्ष २०७५/०७६ मा तीन बालबालिका नौ जना महिलासहित ७३ जना पुरुष गरी ८५ जनाले ज्यान गुमाए भने आर्थिक वर्ष २०७७६/०७७ मा चार बालबालिका १० जना महिलासहित ४८ जना पुरुषले ज्यान गुमाएका छन् । त्यस्तै गत आर्थिक वर्ष २०७७/०७८ मा मात्रै ९३ जनाले सवारी दुर्घटनाकै कारण ज्यान गुमाउनुपरेको छ । गत आर्थिक वर्षमा छ जना बालबालिकासहित १२ जना महिला र ७५ जना पुरुषले दुर्घटनामा ज्यान गुमाएको ट्राफिक प्रहरीको तथ्याकमा उल्लेख गरिएको छ ।

झापामा चालू आर्थिक वर्षको आठ महिनामा मात्रै ८२ जनाले सवारी दुर्घटनाकै कारण ज्यान गुमाइसकेका छन् । चार बालबालिकासहित १२ जना महिला र ६६ जना पुरुषले सवारी दुर्घटनाकै कारण ज्यान गुमाउनुपरेको हो । चालू आर्थिक वर्ष २०७८/०७९ मा भएका दुर्घटनामा एक सय ६९ जना गम्भीर घाइते भएका छन् ।

आठ महिनामा चार सय १२ वटा सवारी दुर्घटनामा परेका हुन् । जसमध्ये सबैभन्दा धेरै मोटरसाइकल दुर्घटना रहेको ट्राफिक प्रहरी निरीक्षक चापागाईले बताउनु भयो । सवारी दुर्घटना बढ्नु्मा मुख्य कारण सडकको दुरावस्था र चालकको लापरवाही रहेको प्रहरीले जनाएको छ ।