ईलाम/ चिया उत्पादनमा नाम कमाएको इलाम जिल्लामा कफिको समेत उत्तिकै सम्भावना रहेको पाइएको छ । बजारको समस्या नभएपछि ईलामका किसानहरु कफि खेतीमा आकर्षित भएका छन् । कफिको दाना दानै र विरुवा समेत राम्रो मुल्यमा विक्रि भएपछि पश्चिमी इलामको माङसेबुङका किसान कफि उत्पादनमा लागेका हुन् ।
जिल्लाको माङसेबुङ गाउँपालिका तोभाङ आसपासका करिव २ सय ५० परिवार कफि खेतीमा संलग्न भएका छन् । कफिमा राम्रो आम्दानी लिन सकिने देखेर यहाँका केहि अगुवा किसानले गत वर्ष मात्र ६० हजार कफिका विरुवा वितरण गरि रोपेका थिए । विरुवा विक्रिबाट पाँच लाख आम्दानी भएको स्थानीय याम कार्की बताउँनुहुन्छ ।
कफिको लागि विदेशको समेत बजार हेरेर श्रोत खुलेका कफिका विरुवा लगाएका किसानहरुको भनाई छ । यहाँका किसानले अराविका र बोरबन जातका कफि खेती गर्दै आएका छन् । तयारी कफीका लागि चेरी खरीद गरी पार्चमेन्ट तयार पार्ने र सुकाएर निकासी गर्ने गरिएको छ । तोभाङका किसानले बार्षिक दुइ टन बढि पार्चमेन्ट निकासी गर्ने गरेको कफि खेतीमा लाग्नुभएका स्थानीय कृषक कृष्णबहादुर लिम्बूको भनाइ छ ।
कफिमा आत्मनिर्भर बनाई विदेशमा समेत निर्यात गर्ने उदेश्यले कृषि ज्ञान केन्द्र इलामले कफि खेती विस्तार कार्यक्रम संचालन गरेको छ । चालु आर्थिक वर्षमा १२ हेक्टर क्षेत्रमा कफि खेति विस्तार गर्ने लक्ष्य रहेको छ ।
कफि विस्तारका लागि तीस लाख बजेट छुट्टीएको छ । कफि खेतीमा आवश्यक प्राविधिक ज्ञान, अर्गानिक प्रमाणपत्र र प्रशोधन केन्द्रको व्यवस्था हुनुपर्ने किसानहरुको भनाई छ ।
