काठमाडौं,२४ वैशाख । अख्तियार दुरुपयोग अनुसन्धान आयोगले पोखरा क्षेत्रीय अन्तर्राष्ट्रिय विमानस्थल निर्माणका क्रममा ठेकेदार कम्पनीलाई गैरकानूनी रूपमा कर छुट दिएर भ्रष्टाचार गरेको ठहर गर्दै पूर्वअर्थमन्त्री ज्ञानेन्द्र बहादुर कार्कीसहित १३ जनाविरुद्ध मुद्दा दायर गरेको छ।
आयोगले बिहीबार विशेष अदालतमा तत्कालीन मन्त्री, उच्च सरकारी अधिकारी र चिनियाँ निर्माण कम्पनीका पदाधिकारीहरूलाई प्रतिवादी बनाउँदै आरोप(पत्र दायर गरेको हो।
भ्रष्टाचार मुद्दा दायर गरिएका मुख्य व्यक्तिहरूमा तत्कालीन अर्थमन्त्री ज्ञानेन्द्र बहादुर कार्की, तत्कालीन सचिवहरू शंकर प्रसाद अधिकारी र महेश्वर न्यौपाने रहेका छन्। अख्तियारले उनीहरूविरुद्ध ३ अर्ब ६२ करोड ५ लाख २२ हजार १६० रुपैयाँ बिगो कायम गरी जरिवाना र कैद सजायको माग गरेको छ।
त्यसैगरी, नेपाल नागरिक उड्डयन प्राधिकरणका तत्कालीन महानिर्देशक संजीव गौतमसहित विभिन्न मन्त्रालयका तत्कालीन सहसचिव, उपसचिव, आयोजना निर्देशक र शाखा अधिकृतहरूमाथि पनि समान बिगो कायम गरिएको छ।
अख्तियारका अनुसार पोखरा विमानस्थल निर्माणका लागि नेपाल नागरिक उड्डयन प्राधिकरण र चिनियाँ ठेकेदार कम्पनी चाइना सीएएमसी इन्जिनियरिङ बीच भएको मूल सम्झौतामा सबै कर, महसुल र शुल्कहरू ठेकेदार कम्पनीले नै तिर्नुपर्ने स्पष्ट व्यवस्था थियो।
तर, उक्त प्रावधान विपरीत तत्कालीन अर्थमन्त्री कार्कीसहितका पदाधिकारीहरूले बदनियतपूर्वक ुइम्प्लिमेन्टेसन एग्रिमेन्टु गराई ठेकेदार कम्पनीलाई कर छुट दिने शर्त राखेको अनुसन्धानबाट खुलेको छ। यस प्रक्रियाबाट ठेकेदार कम्पनीलाई दोहोरो लाभ दिलाइएको र नेपाल सरकारलाई ३ अर्ब ६२ करोडभन्दा बढीको प्रत्यक्ष हानिनोक्सानी पुर्याइएको अख्तियारको ठहर छ।
आयोगले निर्माण कम्पनी चाइना सीएएमसी इन्जिनियरिङ, त्यसका अध्यक्ष वाङ पो र परियोजना प्रबन्धक याङ चिकाङलाई पनि मतियारको रूपमा मुख्य कसुरदार सरह नै सजाय मागदाबी गरेको छ।
