दमक, १८ जेठ / युवा, साना व्यवसायी तथा सूक्ष्म उद्यमीहरूलाई डिजिटल प्रविधिमार्फत सशक्त बनाउने उद्देश्यले दमकमा डिजिटल उद्यमशीलता तालिम सुरु भएको छ ।
वर्ल्डलिन्कले सञ्चालन गरेको तालिमको दमक नगरपालिकाका प्रमुख रामकुमार थापाले उद्घाटन गर्दै डिजिटल सीपले युवाहरूलाई आत्मनिर्भर र उद्यमशील बन्न सहयोग पुग्ने विश्वास व्यक्त गर्नुभयो ।
वर्ल्डलिन्कले आफ्नो सामाजिक उत्तरदायित्व (CSR) कार्यक्रमअन्तर्गत नेपालमै पहिलो पटक उक्त तालिम सञ्चालन गरेको वर्ल्डलिन्कका कोशी प्रदेश जनसम्पर्क प्रमुख राजन तिम्सिनाले जनाउनु भयो । डिजिटल युगमा व्यवसाय विस्तार, बजार पहुँच वृद्धि तथा प्रतिष्पर्धात्मक क्षमता अभिवृद्धिका लागि यस्ता तालिम प्रभावकारी हुने विश्वास गरिएको उहाँले उल्लेख गर्नुभयो । यस कार्यक्रमले स्थानीय उद्यमीहरूलाई प्रविधिमैत्री व्यवसाय सञ्चालन गर्न थप सहयोग पुग्ने अपेक्षा गरिएको छ।
कार्यक्रममा बोल्दै कम्पनीकी सीएसआर प्रमुख अनुपा भण्डारी जलनले डिजिटल सीप र प्रविधिको प्रभावकारी प्रयोगमार्फत युवा तथा उद्यमीहरूको व्यवसायिक क्षमता अभिवृद्धि गर्ने उद्देश्यका साथ कार्यक्रम सञ्चालन गरिएको बताउनु भयो ।
तालिममा युवा, साना व्यवसायी तथा सूक्ष्म उद्यमी गरी २५ जनाको सहभागिता रहेको छ । सहभागीहरूलाई डिजिटल मार्केटिङ, सामाजिक सञ्जालको व्यवसायिक उपयोग, अनलाइन प्रवद्र्धन तथा आधुनिक प्रविधिको प्रयोगसम्बन्धी व्यावहारिक ज्ञान प्रदान गरिएको छ ।
वर्ल्डलिंक कम्युनिकेसन्स लिमिटेड नेपालको सबैभन्दा ठूलो इन्टरनेट सेवा प्रदायक ISP रुपमा आफूलाई अघि बढाइरहेको छ । कम्पनी सन् १९९५ मा स्थापना गरिएको थियो र हाल देशभर फाइबर इन्टरनेट, IPTV (NETTV), व्यवसायिक नेटवर्क समाधान तथा विभिन्न डिजिटल सेवाहरू प्रदान गर्दै आएको छ ।
