विराटनगर / मोरङको लेटाङमा एक जना महिला प्रहरीको हत्या आरोपमा पक्राउ परेका २० जना विरुद्ध मोरङ प्रहरीले म्याद थप गरी अनुसन्धान सुरु गरेको छ ।
पहिलो चरणमा ९ र पछि थप ११ जना गरी प्रहरीले मोरङ अदालतमा २० जनालाई ‘कर्तव्य ज्यान मुद्दा’ म्याद थप गरी अनुसन्धान सुरु गरेको हो । चैत ६ गते मोरङको लेटाङमा हिंसात्मक झडप हुँदा प्रहरी जवान २६ वर्षीय उर्मिला श्रेष्ठको हत्या भएको थियो । सोही घटनामा संलग्न भएको आरोपमा प्रहरीले एक जना महिलासहित २० जनालाई पक्राउ गरेको हो ।
पक्राउ पर्नेहरूमा लेटाङ नगरपालिका–५ का ४८ वर्षीय चन्द्र तामाङ भन्ने चन्द्रकान्ता लामा, सोही ठाउँका २५ वर्षीय रविन राई, २० वर्षीय रविन तामाङ, लेटाङ–६ का १८ वर्षीय बलराम भन्ने पालाराम राई, सोही वडाका १८ वर्षीय राम राई, १८ वर्षीय सन्तोष पौडेल, २० वर्षीय हिमाल श्रेष्ठ, लेटाङ–५ का २३ वर्षीय प्रदीप राई, सोही वडाकी १८ वर्षीया निशा पुलामी मगर, १८ वर्षीय सुरज अधिकारी, १९ वर्षीय सञ्जय मगर रहेका छन् ।
यस्तै मिक्लाजुङ गाउँपालिका–२ घर भई लेटाङ–५ बस्ने २० वर्षीय कृष्ण विक, लेटाङ–५ का सञ्जीव प्रधान, प्रनिस कट्टेल, झविन भन्ने जस्वीन पाख्रिन, सुनिल लिम्बू, प्रह्लाद खड्का, अर्पण परियार, पासाङ तामाङ र लेटाङ–६ का श्रवण यादवलाई पक्राउ गरेको मोरङ प्रहरीले जनाएको छ । घटनाको अनुसन्धान गर्दै हत्यामा संलग्नलाई पक्राउ गरिएको मोरङ प्रहरीका प्रमुख एसपी जनार्दन जिसीले जानकारी दिए । ‘अहिलेसम्म २० जनालाई पक्राउ गरिएको छ’ उनले भने, ‘घटनाको अनुसन्धान भइरहेको छ ।’
महिला प्रहरीको ज्यानै जाने गरी भएको लेटाङ घटनाको अनुसन्धानको लागि प्रहरीको केन्द्रीय अनुसन्धान ब्यूरो (सिआईबी), १ नम्बर प्रदेश प्रहरी र जिल्ला प्रहरी मोरङको संयुक्त टोली परिचालन भएको छ । ‘हिंसात्मक झडपको घटनाको अनुसन्धानका लागि संयुक्त रूपमा अनुसन्धान सुरु भएको छ’ उनले भने, ‘अनुसन्धान गर्दै पक्राउ गर्ने र सोधपुछको क्रम जारी नै रहेको छ ।’
स्थानीयका अनुसार लेटाङ क्षेत्रका लागू्औषध प्रयोगकर्ताहरू प्रहरी ‘टार्गेट’ मा बढी परिरहेका छन् । लेटाङ तनाव सुरु भएलगत्तैदेखि लागूऔषध प्रयोगकर्ताहरू प्रहरीप्रति आक्रामक रूपमा प्रस्तुत भइरहेको जानकारी आएको प्रहरी स्रोतको दाबी छ । ‘यसअघि आपराधिक पृष्ठभूमि भएका, लागूऔषधका प्रयोगकर्ताहरूमाथि शङ्का बढी छ’ स्रोतले भन्यो, ‘उनीहरूलाई ल्याएर सोधपुछ गर्ने क्रम जारी छ ।’
यसअघि लागूऔषधको कारोबारी र प्रयोगकर्ताहरूलाई प्रहरीले पक्राउ गरी मुद्दा चलाउँदै आएको थियो । ‘पक्राउ गरी मुद्दा चलाएको रिस फेर्न पनि कारोबारी र प्रयोगकर्ताहरूले प्रहरीलाई निसाना बनाएको देखिएको छ’–अनुसन्धानमा संलग्न प्रहरी अधिकारीले भने । प्रहरीले यस घटनामा संलग्नलाई पक्राउ गरी घटनाको अनुसन्धान गर्न ठूलो सङ्ख्यामा प्रहरी परिचालन गरेको छ ।
‘घटना घटाएपछि आरोपी फरार भएका छन् । उनीहरू जङ्गलमा रहेको हुनसक्ने भएकोले प्रहरीले लेटाङ, केराबारी र मिक्लाजुङसँगै उत्तरी क्षेत्रको सर्च अभियान पनि सुरु गरेको छ’ घटनाको अनुसन्धान गर्दै आएका एक प्रहरी अधिकृतले भने, ‘अहिले आरोपी भाग्न नपाओस् भनेर जङ्गल र जिल्ला नाकासहित चारै तिर प्रहरी परिचालन गरिएको छ ।’
अहिले घटनाको अनुसन्धान गर्न मोरङ प्रहरीका डिएसपी मञ्जिल मुकारुङसहितका प्रहरी अधिकारीहरूले अनुसन्धान गर्दै आएको छ । यस घटनाको प्रदेश १ प्रहरी कार्यालय विराटनगरले एसएसपी राजेन्द्रप्रसाद चौधरीको नेतृत्वमा प्रदेश प्रहरी कार्यालयले पाँच सदस्यीय छानबिन समिति गठन गरेर छानबिन पनि सुरु गरेको छ ।
समितिमा एसएसपीसहित एक जना डिएसपी, इन्स्पेक्टर र दुई जना असइ रहने १ नम्बर प्रदेश प्रहरी कार्यालय विराटनगरका डिआइजी अरुणकुमार बिसीले जानकारी दिए । छानबिन समितिले अनुसन्धान पूरा गरेपछि प्रदेश प्रहरी कार्यालयमा प्रतिवेदन बुझाउनेछ ।
