काठमान्डौं , २४ असार ।नेपाली विद्यार्थीले पाकिस्तानमा बीएससी इन्जिनियरिङ अध्ययनका लागि छात्रवृत्तिको अवसर पाउने भएका छन्।
शिक्षा, विज्ञान तथा खेलकुद मन्त्रालयले सूचना जारी गर्दै इच्छुक तथा योग्य विद्यार्थीसँग आवेदन मागेको हो।
मन्त्रालयका अनुसार ‘पाकिस्तान प्राविधिक सहायता कार्यक्रम’ अन्तर्गत शैक्षिक सत्र २०२६–२७ का लागि पाकिस्तानी विश्वविद्यालयहरूमा सिभिल, कम्प्युटर र इलेक्ट्रिकल इन्जिनियरिङ विषयमा अध्ययन गर्न कुल ६ वटा छात्रवृत्ति उपलब्ध गराइनेछ। प्रत्येक विषयमा एक महिलासहित दुई–दुई जना विद्यार्थी छनोट हुनेछन्।
छात्रवृत्तिका लागि आवेदन दिन कक्षा १२ वा सोसरहको परीक्षामा न्यूनतम ६० प्रतिशत अंक प्राप्त गरेको हुनुपर्नेछ। साथै, इन्जिनियरिङ अध्ययन संस्थान (आईओई) ले २०८२ सालमा सञ्चालन गरेको स्नातक तहको प्रवेश परीक्षाको योग्यताक्रममा नाम समावेश भएको हुनुपर्ने मन्त्रालयले जनाएको छ।
इच्छुक विद्यार्थीले तोकिएको अनलाइन प्रणालीमार्फत आइतबारभित्र आवेदन दिनुपर्ने मन्त्रालयले जनाएको छ।
