झापा/ मेची पेट्रोलियम डिलर्स एशोसिएशनले राष्ट्रिय पेट्रोलियम व्यवसाय संस्थागत समन्वय समितिले नेपाल आयल निगममा पेस गरेको माग र माग पुरा गराउन घोषित आन्दोलनका कार्यक्रम प्रति ऐक्यबद्धता जनाएको छ ।
एशोसिएशनले झापाका प्रमुख जिल्ला अधिकारी र नेपाल आयल निगम चारआली डिपोका प्रमुखलाई ज्ञापन पत्र बुझाउँदै माग सम्बोधन गर्न माग गरेको छ । झापाका प्रमुख जिल्ला अधिकारी छविलाल रिजाल र नेपाल आयल निगम चारआली डिपोका प्रमुख भीम विश्वकर्मालाई ज्ञापन पत्र बुझाइएको मेची पेट्रोलियम डिलर्स एशोसिएशनका अध्यक्ष नवीन कोइरालाले जानकारी दिए ।
अध्यक्ष कोइरालाले ब्यवसायीहरुको मागको सम्बोधनमा सम्बन्धित पक्षले चासो नदिँदा गम्भीर समस्या भोग्नुपर्ने अवस्थाको सिर्जना हुने चेतावनी दिएका छन् । नेपाल एलपि ग्यास उद्योग संघ, नेपाल पेट्रोलियम डिलर्स राष्ट्रिय एशोसिएशन तथा नेपाल पेट्रोलियम ढुवानी व्यवसायी महासंघ सम्बद्ध राष्ट्रिय पेट्रोलियम व्यवसाय संस्थागत समन्वय समितिले आयल निगम समक्ष तत्काल पेट्रोलियम ऐन बनाई लागू गर्नुपर्ने लगायतका ६ बुँदे माग राखेको छ ।
समन्वय समितिले आयल निगमको एलपीजी र विक्रेता विनियमावली तथा ढुवानी नियमावली सम्बन्धित व्यवसायी संस्थाको प्रतिनिधि सहितको सहभागितामा परिमार्जन र संशोधन गर्नुपर्ने, यातायात क्षेत्रमा लागू गरेको वैज्ञानिक भाडा दर अनुसार पेट्रोलियम ढुवानी साधनमा समेत लागू गर्न, निगमद्वारा गठित अध्ययन समितिको प्रतिवेदन अनुसार यथाशीघ्र लागू गर्न माग गरिएको छ ।
समन्वय समितिले प्रस्तुत गरेका माग पुरा नभएसम्म चैत २० गतेबाट देशव्यापी रुपमा एलपी ग्यास उद्योग र ग्यास विक्रेताहरूले ग्यास, पेट्रोलियम ढुवानी टैंकरहरुले ढुवानी तथा पेट्रोलियम विक्रेताहरूले विक्री स्थल एवं पेट्रोलियम पदार्थको विक्री वितरण बन्द गर्ने लगायतका आन्दोलनका कार्यक्रम रहेको बताइएको छ ।
आन्दोलनका कार्यक्रमलाई प्रभावकारी बनाउन एशोसिएशनले विभिन्न दबाब मूलक कार्यक्रम गरिरहेको बताइएको छ ।
