काठमाडौँ,३ भदौ । सुरक्षित आवागमनका लागि करोडौँ खर्चेर बनाइएका आकाशे पुललाई बेवास्ता गर्दै चक्रपथमा पैदलयात्रुहरू दैनिक ज्यानकै बाजी लगाएर सडक पार गरिरहेका छन्। बालकुमारीदेखि सातदोबाटो, एकान्तकुना हुँदै कलङ्कीसम्मको खण्डमा तीव्र गतिमा गुड्ने सवारीसाधनका बिचबाटै डिभाइडर नाघेर बाटो काट्ने दृश्य सामान्य बनेको छ।
छिटो पुग्ने हतारो, छोटो बाटो रोज्ने बानी र कतिपय ठाउँमा पुलसम्म पुग्ने असहज पहुँचका कारण यात्रुहरूले यस्तो जोखिम मोलिरहेका छन्। अर्कातर्फ, चक्रपथका केही स्थानमा आवश्यक जेब्रा क्रसिङ र आकाशे पुल नै नहुँदा सर्वसाधारण ज्यान जोखिममा पारेर बाटो काट्न बाध्य छन्। यसले गर्दा पैदलयात्रु मात्र नभई तीव्र गतिका सवारी चालकसमेत अचानक दुर्घटनाको सिकार बन्ने खतरा बढेको छ।
पैदलयात्रुको सुरक्षालाई प्रभावकारी बनाउन केवल पुल बनाएर मात्र नपुग्ने देखिन्छ। यसका लागि सहज पहुँच, रात्रिकालीन बत्ती, स्पष्ट ट्राफिक सङ्केत, डिभाइडरमा अग्ला रेलिङ तथा उचित स्थानमा जेब्रा क्रसिङको व्यवस्थासँगै कडा ट्राफिक व्यवस्थापन तत्काल आवश्यक छ।
