काठमाडौं,८ भदौ । नेकपा एमालेका सांसद ऐनबहादुर महरले कैलालीमा सार्वजनिक यातायातको गाडीको ठक्करबाट एक महिलाको मृत्यु भएको घटनामा दोषीमाथि कडा कारबाही गर्न सरकारको ध्यानाकर्षण गराउनु भएको छ ।सोमबार बसेको प्रतिनिधिसभा बैठकमा बोल्दै सांसद महरले शनिबार साँझ करिब ४ः४५ बजे कैलालीको गोदावरी नगरपालिका–२ नजिकै महाकाली यातायातको गाडीले बझाङको मष्ट गाउँपालिका–६ की सिङ्की बोहरालाई ठक्कर दिएको बताउनु भयो । उहाँका अनुसार ठक्करबाट सामान्य घाइते भएकी बोहरालाई गाडीले ब्याक गरेर पुनः ठक्कर दिँइ घटनास्थलमै मृत्यु भएको हो ।
घटनापछि मृतकका आफन्तहरू घटनास्थलमा जम्मा भएर विरोध जनाउँदा प्रहरीले गाडीमाथि कानुनी कारबाही गर्नुको सट्टा शवलाई जबर्जस्ती उठाएर लगेको बताउनु भयो । सो क्रममा प्रहरीले लाठी प्रहार गर्दा मृतकका श्रीमान्को टाउकोमा चोट लागेको उहाँले बताउनु भयो ।उहाँले घटनापछि भएको प्रदर्शनमा प्रहरीले लाठीचार्ज गर्दा केही व्यक्ति घाइते भएको बताउनु भयो । घाइतेमध्ये केहीलाई उपचारका लागि अस्पताल भर्ना गरिएको उल्लेख गर्नु भयो । प्रहरीले कति पयलाई लाठी हानेर घाइते बनाएको छ । र अस्पतालमा भर्ना भएका छन् । उहाँको बालबचाको विजोक भएको छ ।
सांसद महरले घटनाको निष्पक्ष छानबिन गरी दोषीमाथि हदैसम्मको कारबाही गर्न माग गर्नु भएको छ । सार्वजनिक यातायात क्षेत्रमा देखिएको लापरबाही, गैरजिम्मेवारी र अराजकता नियन्त्रण गर्न सरकार गम्भीर बन्नुपर्ने उहाँले बतायनु भयो ।
