काठमाडौ ,१० साउन | पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले बाढीका कारण नदीमा पानीको बहाव बढेकाले नदी किनारका बासिन्दालाई सतर्क रहन आग्रह गर्नुभएको छ।
अध्यक्ष ओलीले बुधबार अपिल जारी गर्दै रसुवाको भोटेकोशी र त्रिशूली नदीमा बाढीका कारण पानीको बहाव बढेको जानकारी गराउँदै रसुवा, नुवाकोट, धादिङ र चितवनका नदी किनारका बासिन्दालाई सुरक्षित स्थानमा बस्न आग्रह गर्नुभएको हो।
उहाँले सम्भावित जोखिमलाई ध्यानमा राख्दै स्थानीय बासिन्दालाई उच्च सतर्कता अपनाउन अपिल गर्नुभएको छ।
यस्तै, ओलीले नेकपा एमालेका पार्टी कमिटी, जनसंगठन तथा स्वयंसेवकहरूलाई स्थानीय प्रशासन र सुरक्षा निकायसँग समन्वय गरी उद्धार कार्यमा सहयोग गर्न तयारी अवस्थामा रहन आग्रह गर्नुभएको छ।
बाढी तथा विपद्का कारण हुनसक्ने थप क्षतिलाई न्यूनीकरण गर्न सबै पक्षबीच समन्वय र सहकार्य आवश्यक रहेको उहाँको भनाइ छ।
