दमक, १२ असोज | दसैँ, तिहारलगायतका चाडपर्वलाई लक्षित गर्दै झापामा चामल, चिनी र नुनको सहुलियत मूल्य तोकिएको छ।
प्रमुख जिल्ला अधिकारी श्रवणकुमार पोखरेलको संयोजकत्वमा सोमबार कृषि सामग्री कम्पनी लिमिटेड, साल्ट ट्रेडिङ कर्पोरेशन लिमिटेड र खाद्य व्यवस्था तथा व्यापार कम्पनी लिमिटेडका कार्यालय प्रमुखबीच बसेको बैठकले खाद्य सामग्रीको सहुलियत मूल्य निर्धारण गरेको हो।
निर्णयअनुसार चामल जिरा मसिनो प्रतिकेजी ७५ रुपैयाँ मा बिक्री गरिनेछ। यसको अधिकतम बिक्री मूल्य ८० रुपैयाँ रहेकामा ५ रुपैयाँ छुट दिइएको हो।
त्यस्तै, चामल सोना मन्सुली प्रतिकेजी ५७ रुपैयाँ मा बिक्री हुनेछ। यसको अधिकतम बिक्री मूल्य ६२ रुपैयाँ रहेकामा ५ रुपैयाँ छुट दिइएको हो।
बैठकले चिनीको सहुलियत मूल्य प्रतिकेजी ११० रुपैयाँ र नुनको मूल्य प्रतिकेजी २४ रुपैयाँ तोकेको छ। नुनमा प्रतिकेजी २ रुपैयाँ छुट दिइएको हो।
चाडपर्वका समयमा सर्वसाधारणलाई खाद्य सामग्रीको सहज आपूर्ति सुनिश्चित गर्न पर्याप्त मौज्दात कायम राख्ने तथा सहुलियत मूल्यमा बिक्रीका लागि सुपथ मूल्य पसल सञ्चालन गर्ने निर्णयसमेत भएको छ।
यस्तै, साल्ट ट्रेडिङ कर्पोरेशनले झापाका २५ भन्दा बढी विक्रेतामार्फत थोक रूपमा नुन उपलब्ध गराउने निर्णय गरेको छ।
बैठकले स्थानीय उद्योग वाणिज्य संघ, व्यापारिक संघसंस्था तथा निजी क्षेत्रका व्यवसायीलाई समेत चाडपर्वको अवसरमा उपभोक्ताका लागि सहुलियत, छुट तथा राहतका प्याकेज घोषणा गरी कार्यान्वयन गर्न सार्वजनिक आह्वान गर्ने निर्णय गरेको छ।
