खोटाङ,९ कार्तीक । खोटाङको हलेसी तुवाचुङ नगरपालिकामा एक व्यक्तिले ससुराली पुगेर धारिलो हतियार प्रहार गर्दा श्रीमतीसहित चार जना घाइते भएका छन्। घाइतेमध्ये तीन जनाको अवस्था गम्भीर रहेको छ। हलेसी तुवाचुङ नगरपालिका–३ आहालेका ४३ वर्षीय नइन्द्रकुमार राईले ससुराली घर पुगेर धारिलो हतियार प्रहार गरेका हुन्।
आक्रमणबाट ४० वर्षीया अन्जना राईको टाउकोको पछाडि, ६२ वर्षीया स्यामाउन राईको टाउको र दाहिने हातमा तथा २५ वर्षीया तेनिना राईको टाउकोमा गम्भीर चोट लागेको प्रहरीले जनाएको छ। त्यस्तै, आक्रमणमा परी नरेन्द्र राईको दाहिने हातमा चोट लागेको र उनको अवस्था भने मध्यम रहेको छ। घाइते चारै जनाको हाल नगर अस्पताल दुर्छिममा उपचार भइरहेको छ। घटनामा संलग्न नइन्द्रकुमार राईलाई प्रहरीले नियन्त्रणमा लिएको छ। आक्रमणको कारण हालसम्म नखुलेको र घटनाबारे आवश्यक अनुसन्धान भइरहेको प्रहरीले जनाएको छ।
