दमक, ३ असोज । दमक नगरपालिकाले आर्थिक वर्ष २०८१÷८२ को वार्षिक कार्यक्रम समेटिएको बजेट पुस्तिका सार्वजनिक गरेको छ ।
बुधबार दमक नगरको सभाहलमा सम्पन्न कार्यक्रममा बिभिन्न योजनाहरु समेटिएको बजेट नीति तथा कार्यक्रमको पुस्तक सार्वजनिक गरिएको हो ।
सीमित श्रोतसाधनबाट असीमित आवश्यकता पुरा गर्ने चुनौती रहेको भन्दै विकास व्यवस्थापनका प्राथमिकता समेटिएको सो पुस्तक सार्वजनिक गरिएको उल्लेख छ ।
‘गुणस्तरीय शिक्षामा लगानी, ल्याउँछ सुनौलो बिहानी’ भन्ने नारा सहित नगरले शिक्षालाई प्राथमिकता दिएर कार्यक्रम सार्वजनिक गरेको छ । जसअन्तर्गत अभिभावकविहीन बालबालिकाको नगरपालिकाले अभिभावकत्व ग्रहण गर्ने र माद्यमिक तहसम्मको अध्ययन गर्ने अवसर प्रदान गर्ने कार्यक्रम समावेश गरिएको छ ।
नगरमा रहेका सबै सामुदायिक विद्यालयलाई डिजिटलाईजेशन गर्ने गरिका कार्यक्रमहरु पनि समावेश गरिएको छ ।
यसैगरी, लिम्बू र धिमाल भाषालाई स्थानीय शिक्षा प्राणालीमा आवद्ध गराउने पनि कार्यक्रममा समावेश छ ।
‘दमकका महिला उद्यममा पहिला’ नारा ल्याउँदै हरेक वडामा कम्तिमा एउटा महिलाको मात्रै उपभोक्ता समिति गठन गरी विकास व्यवस्थापनको कार्य सञ्चालन गर्ने । त्यसका लागि उत्कृष्ट कार्य गरेकोखण्डमा सम्बन्धित टोल विकास संस्थाको सिफारिसका आधारमा १ लाख ५० हजार नगद सहित सम्मानपत्रले सम्मान समेत गर्ने नगरको रातो कितावमा उल्लेख गरिएको छ ।
‘व्यवस्थित सहर दमकबासीको रहर’ भन्ने नारालाई सार्थकता दिन नक्सा बैंक निर्माण गरी कार्यान्वयनमा ल्याइँने, साझेदारी गर्दा कामको प्रकृतिका आधारमा ६५ देखि ८० प्रतिशतसम्म नगरपालिकाले व्यहोर्नेगरिको साझेदारी कार्यक्रम पनि सार्वजनिक गरिएको छ ।
नगरपालिकाले यो वर्ष विकासका काम र अन्य गतिविधि सम्पन्न गर्नका लागि १ अर्व ६३ करोड ८ लाख रुपैँयाको बजेट नगर पुस्तिकामा प्रकाशन गरेको छ ।
गत असार ९ गतेको नगरसभामा पेस गरिएको बिनियोजन बिधेयक २०८१ असार २१ गतेको नगरसभाले पारित गरेको थियो । बजेट पुस्तिका सार्वजनिकसँगै नगरका शाखागत रिपोर्ट तथा वडागत वार्षिक रिपोर्ट पनि कार्यक्रममा प्रस्तुत गरिएको थियो ।
यसखाले कार्यक्रमको पुस्तिका सार्वजनिक भएपछि कार्यक्रममा सहभागी स्थानीय तीर्थराज बस्नेत, भेषराज न्यौपानलेसहितले आआफ्नो विचार, राय र सुझाव पनि राख्नुभएको छ ।
यसपछि अवकास प्राप्त शिक्षकहरुलाई, एसईईमा उत्कृष्ट अंक ल्याउने दमकका विद्यार्थीहरुलाई समेत सम्मान गरिएको छ । यस्तै, कृषि विकास शाखा, खरिद तथा जिन्सी उपशाखा उत्कृष्ट शाखा भएको भन्दै तत् शाखालाई सम्मान गरिएको छ । उत्कृष्ट वडा तर्फ वडा नम्बर ३ र ७ लाई सम्मान गरिएको छ ।
वडा र शाखागत प्रस्तुतिलाई कामको मूल्यांकन गर्नका लागि पनि यसखाले रिपोर्टहरु सार्वजनिक गर्न अभ्यास थालिएको नगरका प्रमुख प्रशासकीय अधिकृत गणेशराज कार्कीले जनाउनु भयो । सबैले उत्कृष्ट कार्यक्रम गर्ने गरेको भएपनि कर्मचारीसहितको वडा र शाखालाई नगरवासीको उपस्थितीमा हुने सार्वजनिक सम्मानले थप प्रेरणा र सुझाव समेत पाउन सकिने उहाँले धारणा राख्नुभयो ।
यसपछि सहभागिको जिज्ञासालाई समेत जवाफ दिदै दमक नगरपालिकाका प्रमुख राम कुमार थापाले भन्नु भयो ‘कार्यक्रम त सार्वजनिक गरिएको छ । तर यसको कार्यान्वायन गर्न भने उत्तिकै चुनौती समेत रहेको छ । ’ सीमित श्रोतसाधानका कारण जनताका अपेक्षा पुरा गर्न नसकिएला कि भन्ने डर आफुमा रहेको नगर प्रमुख थापाले बताउनु भयो ।
