पथरी, ५ असोज । मोरङको पथरी शनिश्चरेमा रहेर आफ्नो सुगठित शरीरमार्फत देश विदेशमा आफ्नो पहिचान बनाएर पुरस्कृत हुनु भएका प्रकाश राईको निधनमा नगरपालिकाले आइतबार ( भोलि) नगरमा शोक बिदा दिने भएको छ ।
असोज २ गते विहान हृदयघातका कारण काठमाडौंस्थित ग्राण्डी अस्पतालमा निधन हुनु भएका पथरी शनिश्चरे १ पथरी बजारका ४५ वर्षीय राईको निधनले नगरमा ठूलो क्षति पुगेको भन्दै उहाँको सम्मान र सम्झनामा आइतबार स्वास्थ्य संस्था बाहेकका नगरका सरकारी कार्यालय, शैक्षिक संस्थाहरुमा शोक बिदा दिने निर्णय भएको उल्लेख गर्दै नगरले सार्वजनिक सूचना जारी गरेको छ ।
प्रकाशको सम्मानमा शनिबार नगरमा शवयात्रा निकालिएको छ । सो सन्दर्भको शोक सभामा बोल्दै नगर प्रमुख मोहनप्रसाद तुम्बापोले नगरलाई अन्तर्राष्ट्रियस्तरसम्म चिनाउने खेलाडीको निधनले अपुरणीय क्षति पुगेको उल्लेख गर्दै दुःख व्यक्त गर्नुभयो ।
काठमाडौंमा सम्पन्न पाँचौं राष्ट्रिय खुला मिस्टर काठमाडौं शारीरिक सुगठन प्रतियोगितामा प्रथम हुनुभएका प्रकाश काठमाडौंमै रहेको बेला हृदयघातको शिकार बन्नु भयो ।
यसअघि नेपालको राष्ट्रिय प्रतियोगिता तथा हङकङसहितका देशका अन्र्तराष्ट्रिय प्रतियोगितामा प्रथम बनिसक्नु भएका राईले काठमाडौंको यो पटकको प्रतियोगितामा नगद १ लाखसहितको पुरस्कार प्राप्त गर्नुभएको थियो ।
२ सय ८ जना खेलाडीमध्ये राई प्रथम बनेर उपाधि हात पार्नुभएको हो । उहाँ विगत २० वर्षदेखि शारीरिक सुगठनको अभ्यास र त्यसका प्रतियोगितामा सामेल हुनुहुन्थ्यो ।
