दमक,पुस २६
दमक नगरपालिका वडा नं ४ स्थित टुकुरे बस्ति र पिलपलचोकका बासिन्दाहरु ज्याला मजदुरी गरेर आफ्नो दैनिक टार्ने गर्दछन् । यहाँ नजिकै रहेको चिया बगान उनीहरुको मुख्य काम गर्ने थलो हो भने यहाँ बाहेक अन्यत्र कहाँ ज्यालाको काम गरेर त्यसदिनको पारिश्रमीक पाइन्छ उतै काम खोज्दै गर्ने गर्दछन ।
यसरी संघर्षपूर्ण तरिकाले आफ्नो जीविको पार्जन गरिरहेका परिवारमा उज्यालो छर्न अमेरिकामा मुख्य कार्यालय रहेको एच डि एन पि इन्टरनेशनल नामक सस्था यहाँ पुग्यो । दमकमा रहेको आशाको दियो नामक सस्था मार्फत ।
यहाँ रहेका ८० परिवारलाई २ सय वटा बिजुलीका बल्व लिएर यस क्षेत्रमा उज्यालोे छर्ने काम गरिएको एच डि एन पि इन्टरनेशनलका नेपाल संयोजक मीलन आचार्यले बताउनु भयो । विप्पन्न लक्षीत अन्य विभिन्न कार्यक्रम गर्ने र दमकमा रहेका अन्य सस्थासग सहकार्य गरेर त्यस्ता कार्यक्रम गर्ने आचार्यले सुनाउनु भयो ।
दमक नगरपालिकाकी उप–प्रमुख रेगिना भट्टराई प्रसाईको प्रमुख आतिथ्यतामा शुक्रबार एक औपचारीक कार्यक्रमको आयोजना गरी आवश्यकताका आधारमा विजुलीका बल्व वितरण गरीएको हो ।
यस क्षेत्रमा रहेका विप्पन्न नागरीकहरुको दैनिकलाई सहज बनाउन नगरपालिकाले नीतिगत कामहरु गरिरहेको जानकारी दिदै उप प्रमुखले भट्टराईले भन्नु भयो ‘यस खाले सामाजिक सघं सस्थाहरुको पहल र कर्मले पनि समाज सुधारमा महत्वपूर्ण योगदान पुगेको छ । हामी यी सस्था मार्फत पनि लक्षीत वर्गसग जोडीने छौ ।’
आशाको दियो नेपालका अध्यक्ष प्रकाश प्रसाईको अध्यक्षतामा सम्पन्न भएको कार्यक्रममा स्थानीय समाजसेवीहरु झसराज ढकाल, चन्द्र खत्री, मोहन ओली लगायतको उपस्थिती रहेको थियो ।
कार्यक्रम दमक ४ का स्थानीय सामाजीक अगुवा दिपेश दाहालले सञ्चालन गर्नु भएको थियो ।
