दमक, फागुन १६
झापाको दमकमा सम्पन्न कोशी प्रदेशको राष्ट्रिय स्तरको मुख्यमन्त्री महिला भलिबल प्रतियोगिताको उपाधि विभागीय टोली एपीएफले हात पारेको छ ।
बिहीबार सम्पन्न फाइनल खेलमा प्रदेश टिम बागमती प्रदेशलाई सोझो सेटमा हराउँदै एपीएफले उपाधि जितेको हो ।
उपाधि जितेसँगै एपीएफले नगद ५ लाख, मेडल र प्रमाणपत्र प्राप्त गरेको छ । उप बिजेतामा चित्त बुझाएको बागमतीले नगद ३ लाख मेडल र प्रमाणपत्र प्राप्त गरेको छ ।
कोशी प्रदेशका सस्थापक मुख्यमन्त्री शेरधन राईको प्रमुख आतिथ्यता रहेको प्रतियोगिताको फाइनल खेलमा दर्शकको साथ भने बागमतीले पाएको थियो ।
खेल सुरुहुनु अघि नै दर्शक दीर्घाबाट बागमतीको पक्षमा चर्को हुटिङ लागेको भएपनि खेलमा भने नजिता आउन सकेन ।
यद्यपि, एपीएफका समर्थकहरुले भने खेलमैदानमै ढोल ल्याएर र एपीएफको झण्डा समेत ल्याएर फरफराउँदै खेलाडीको प्रोत्साहन बढाइरहेका थिए ।
प्रतियोगिताको बिच बिचमा शुभकामना मन्तव्य चलिरहेको थियो । यहि बिचमा बोल्दै सस्थापक मुख्यमन्त्री राईले समृद्ध नेपाल सुखी नेपालीको अभिभारा पुरा गर्न खेलाडीको भूमिका र खेलाडीलाई बचाउन खेलकुदका गतिविधि हुनु अत्यन्तै सुन्दर पक्ष रहेको उल्लेख गर्नु भयो ।
प्रदेश खेलकुद विकास बोर्ड कोशी प्रदेशको समेत सहयोग रहेको प्रतियोगितामा विशेष अतिथि रहनु भएका बोर्डका सदस्य सचिव पर्शुराम बस्नेतले कोशी प्रदेशमा अहिले खेलकुदका गतिविधि बाक्लै हुन थालेको र कोशी प्रदेश सरकार खेलाडीको संरक्षणमा अघि बढिरहेको उल्लेख गर्नु भयो ।
नेपाल खेलकुद महासघं कोशी प्रदेश कमिटीको आयोजनामा सम्पन्न प्रतियोगितामा बिभिन्न बिभागीय टिम सहित ९ वटा टिम सहभागी भएका थिए । खासगरी महिला खेलाडीहरुको प्रोत्साहनकालागि महिला भलिबल प्रतियोगिताको आयोजना गरिएको महासघंका कोशी प्रदेश अध्यक्ष राजुकमार थापाले जानकारी दिनुभयो ।
तस्बिरहरु: अस्मिका निरौला/उज्यालो खबर
