मुस्ताङ, फागुन १८
पछिल्लो समय उपल्लो मुस्ताङमा हिमचितुवाको आतंकले पशुपालन व्यवसाय सङ्कटमा पर्न थालेको छ ।
हिमचितुवा र मानवबीचको द्वन्द्वले ती क्षेत्रमा पशुपालन व्यवसाय छोड्न थालिएपछि जमिनमा खासै उब्जनी नहुने क्षेत्रमा जिविकोपार्जनमा थप समस्या बढ्दै गएको देखिएको छ । हिमचितुवाको आतङ्कले स्थानीय पशुधनमाथि आक्रमण गरी पटकपटक क्षति तुल्याउने घटना दोहोरिँदा उपल्लो मुस्ताङका किसानको सदियौँ वर्ष पुरानो पशुपालन व्यवसाय सङ्कटमा पर्न थालेको राष्ट्रिय प्रकृति संरक्षण कोष, अन्नपूर्ण संरक्षण क्षेत्र आयोजना (एक्याप) लोमान्थाङले जनाएको छ ।
गत वर्ष उपल्लो मुस्ताङको लोमान्थाङ र लोघेकर दामोदरकुण्ड गाउँपालिका अन्तर्गतका विभिन्न पशुपालक किसानको खर्क र गोठमा रहेका घोडा, खच्चड, याकचौँरी, भेडा–च्याङ्ग्रालगायतमा कुल एक सय ८० वटा पशुधनमा हिमचितुवाले क्षति पुर्याएको एक्याप लोमान्थाङका कार्यालय प्रमुख उमेश पौडेलले जनाउनु भयो । चालु आर्थिक वर्षको १० महिनामा हिमचितुवाले १३ वटा चौपाया मारेको उल्लेख छ ।
चरण क्षेत्र साँघुरिँदा नाउर हिमालबाट घाँसको खोजीमा तल तल झर्न थालेको छ । त्यही नाउरलाई पछ्याउँदै हिमचितुवा घर गोठ आइपुगेको एक्यापको ठहर छ ।
