दमक, चैत १४/ सत्ताको नेतृत्व गरिरहेको नेकपा एमाले आफैं सडकमा आउने भएको छ । जनप्रर्दशन सहित यही चैत ३० गते दमकमा प्रदेशस्तरीय जनसभाको आयोजना गरिएको छ । जसको प्रमुख वक्ता प्रधानमन्त्री तथा नेकपा एमाले अध्यक्ष केपी शर्मा ओली रहनु हुने छ ।
पार्टीले अहिले चलाएको जरा केन्द्रित अभियान अन्तर्गत दमकमा जनसभा गर्न लागिएको नेकपा एमालेका स्थाई कमिटी सदस्य तथा कोशी प्रदेश इञ्चार्ज शेरधन राईले जानकारी दिनुभयो ।
आज दमकमा प्रेस चौतारी नेपाल झापाले आयोजना गरेको पत्रकार सम्मेलनमा बोल्दै नेता राईले भन्नुभयो ‘सरकारले राम्रा काम गरिरहँदा पनि चौतर्फी आलोचना र विरोध मात्रै भइरहेकोले आम जनतालाई त्यसको खास सत्य तथ्य बुझाउन जनप्रर्दशन सहितको आमसभा गर्न परेको हो ।’
कोशी प्रदेशभरिबाट न्यूनतम एक लाख जनालाई सो सभामा सहभागी गराइने योजना बनाइएको छ । पार्टी र जनवर्गीय संठनका तल्लो कमिटीदेखि प्रदेशसम्मका सबै पदाधिकारी र सदस्य तथा भुगोलमा रहेका उपल्लो कमिटिका सबै नेता तथा कार्यकर्ताहरुलाई कार्यक्रममा सक्रिय सहभागिताकालागि उर्दी जारी गरिएको छ । अहिलेको देशको परिस्थिती र त्यसको निकास सहितको सम्बोधन रहेकाले आफुले सत्य तथ्य बुझी आम नगरिकमा सचेतना बढाउन सबै कार्यकर्ताहरुलाई अपिल गरिएको छ ।
