दमक, चैत १९ – देशकै गौरवको आयोजनाका रुपमा रहेको दमक ३ मा निर्मित दमक बिजनेस कम्प्लेक्स (बिजनेस टावर) को आसपास क्षेत्रलाई व्यवस्थित रुपमा विकास गर्ने उद्देश्यले जग्गा एकीकरण (ल्याण्ड पुलिङ) गरिने विषयमा छलफल अघि बढेको छ ।
सहरी विकास मन्त्रालय, सहरी विकास तथा भवन निर्माण विभागका सहसचिवहरूको उपस्थितिमा अघि बढाइएको छलफलमा दमक नगरपालिकाका प्रमुख रामकुमार थापा, उपप्रमुख रेगिना भट्टराई प्रसाई, पूर्व नगर प्रमुख रोमनाथ ओली, प्रमुख प्रशासकीय अधिकृत गणेशराज कार्कीकासाथै कार्यपालिका सदस्य, नगरका प्राविधिक, टावर क्षेत्रका जग्गाधनीहरुको सहभागिता रहेको थियो ।
सहरी विकास तथा भवन निर्माण विभागले ल्याण्ड पुलिङमार्फत व्यवस्थित सहरी विकासका लागि आवश्यक योजनाहरू अघि बढाउने कार्यको लागि छलफल अघि बढाएको हो । छलफलमा भौतिक पूर्वाधार, यातायात व्यवस्थापन, सार्वजनिक पार्क, हरियाली क्षेत्र तथा व्यावसायिक संरचनाहरूको विकाससम्बन्धी विषयवस्तु उठाइएको थियो ।
नगर प्रमुख थापाले सो क्षेत्रलाई व्यवस्थित बनाउन ल्याण्ड पुलिङ प्रभावकारी उपाय भएको उल्लेख गर्दै स्थानीय जग्गाधनीहरूलाई सहकार्य गर्न आग्रह गर्नुभयो । साथै, उपप्रमुख रेगीना भट्टराईले सो परियोजनाले दमकको व्यावसायिक तथा पर्यटन प्रवद्र्धनको सम्भावनालाई अझै उजागर गर्ने बताउनुभयो ।
मन्त्रालयका प्रतिनिधिहरुले ल्याण्ड पुलिङ प्रक्रियाका कानुनी, प्राविधिक तथा आर्थिक पक्षबारे जानकारी गराउँदै यसको सफल कार्यान्वयनका लागि सहजीकरण गर्ने प्रतिवद्धता जनाएका थिए । जग्गा धनीहरूलाई उचित प्रतिफल दिने, संरचनागत विकासलाई प्राथमिकता दिने तथा समुचित सहरी विकासका लागि नगरपालिकासँग सहकार्य गर्न उत्प्रेरित गर्ने कार्यक्रमको लक्ष्य रहेको उल्लेख छ ।
